是咁的，我嘅職業係幫人瞓覺: 一百八十八、否定

友情依樣野，只有大家無利益衝突嘅時候先會存在。

一旦兩個人嘅利益產生矛盾，友情就會瞬間崩潰。

所以喺夢入面，我完全見唔到阿邦有任何美好嘅一面，因為余生心中對佢就只有憎恨。

即使係去唔去婚禮嘅猶豫，余生思考嘅重點都落喺阿婷度，而唔係阿邦身上。

連幼稚園嘅回憶，都只係去到同阿婷道別，無咗之後同陪阿邦嘅片段。





識咗廿幾年嘅好朋友，慢慢堆砌出嚟嘅兄弟情，好似紙牌屋咁散落。

而喺余生嘅夢中，完全搵唔到佢同阿邦係朋友嘅痕跡，連少少碎片都無，只有幾句輕描淡寫話佢地由幼稚園識到大，係好兄弟。

但你問我，喺夢之迷宮遊走咗咁耐，有無確切咁感受到余生同阿邦之間有咩兄弟情？答案係我感受唔到。

「我特登逼自己唔好再去諗任何同阿邦有關嘅事。我地曾經一齊玩過咩玩具、打過幾多場波、去過邊度旅行、食過咩餐廳依啲，我逼自己忘記哂佢。」

如果仲去諗同阿邦一齊嘅開心回憶，盞自己攞苦嚟辛。





對阿婷，都係一樣。唔去諗經歷過咩開心事，只係幻想佢背住自己同james喺埋一齊嘅片段。

為咗逃避痛苦，否認曾經快樂。

余俊朗依個客人，只能夠不停否定自己嘅過去。