是咁的，我嘅職業係幫人瞓覺: 一百七十六、余生嘅幻想

佢唔係真係咁乖，佢根本就唔專一，佢向來都爛玩，佢一直都有咁多男人⋯⋯

只要將對方喺自己心入面扭曲成另一個形態，咁就可以將分手嘅原因推落對方嘅本性身上。

咁做只係想否認一個事實。

佢真係好乖，佢好專一，佢向來都唔蒲唔玩，佢係個廿四孝女朋友⋯⋯

如果佢咁好，點解會分手？





因為佢唔愛我喇。

依個係余生第一個唔想承認嘅事實。

佢唔想承認阿婷唔愛佢嘅事實，所以先會有婷婷，以依個良心嘅角度講出阿婷其實唔愛james嘅事實。

而且到咗夢境嘅最後，阿婷終於發現自己真正愛嘅人係余生。

到底一個人要幾渴望前女友仲愛自己，先可以令潛意識塑造一個外人同佢嘅心境出嚟？





我唔知道，我未試過愛一個人愛得咁深，亦無對離開我嘅人有咩多餘嘅留戀，所以我嘅夢入面絕對無可能出現ex同佢個良心。

但一句到尾，其實只係自欺欺人。

因為一切都只係余生嘅幻想。