是咁的，我嘅職業係幫人瞓覺: 一百七十四、拼圖
好多，真係好多，太多喇。
喺我幫余生瞓咗覺無耐，我去到心房，見到寫住「心之迷宮」嘅房門，腦入面嘅本能同直覺都同我講嗰度好危險，入咗去就無咁易出得返嚟。
不過我個人成日衰好奇，最後唔識死咁走咗入去。
好多發生過嘅事都唔記得，但係好記得入面遇到三個客人：阿俊、阿婷同余生。
我估，佢地都係由心結、遺憾、願望依啲元素，再抽取余先生嘅一部分扭曲而成。
依三個客人各自都係一塊拼圖，但當返到現實，將佢地合埋一齊，先會發現原來係一張更大更清晰嘅風景畫。
每個部分嘅余俊朗都分別達成咗某啲願望，同時渴求某啲幻想。
喺阿俊嘅世界，佢愛情美滿，但係就糾結緊要唔要繼續追求做老師依個理想。
喺阿婷嘅世界，佢已經放低咗舊戀情，但仍然希望得到阿婷嘅道歉同知道真相，以第三者嘅角色睇到自己最希望睇到嘅一幕，就係阿婷同james分手。
喺余生嘅世界，佢已經係一個老師，但就為阿婷同james結婚嘅事而煩惱。