是咁的，我嘅職業係幫人瞓覺: 一百六十八、返咗現實

擘大眼，我成個人仆咗落地吓。

不過我完全感覺唔到痛。

坐起身望一望身後，我好似被人喺房入面踢咗出嚟。

房門慢慢閂埋，門上嘅牌寫住「心之迷宮」。

我返咗心房，即係啱啱一直喺迷宮入面。





心房開始搖動，天崩地裂。

「金仔？你醒喇？唔係協定好瞓八個鐘咋咩？」

擘大眼，係余先生嘅面孔，佢好似有啲擔心。

我打咗個喊路，望下大鐘，我總共瞓咗十個鐘頭，超出咗契約時間，而且我仲非常非常之攰。

睇嚟係因為我走咗入迷宮嘅關係。





我搖搖頭，拎出隨身帶住嘅銀針出嚟消毒，再拮自己嘅手背。

「哇！做咩呀你？」

「例行公事，放心。」

被心之迷宮放返出嚟，加上會痛會流血，終於可以確認自己返咗現實。

喺迷宮入面過咗好似兩個月嘅時間，原來等同現實嘅兩個鐘。





我望向客廳嘅枱，上面無批改好嘅簿。