是咁的，我嘅職業係幫人瞓覺: 一百六十三、已成定局

「道理係人都明嘅，但你內心，點諗先？」

「我⋯⋯我唔甘心⋯⋯」余生嘅拳頭握到好實好實。

無人會甘心。

「但我又可以做到啲咩？所有野都已成定局，咩都改變唔到。」

又一杯水。





補充咗嘅水分，就喺佢對眼流返出嚟。

「你咁樣應該自己瞓一覺好過我幫你瞓喎。」

余生擦走眼淚：「唔得喇，校長查簿，真係要改喇。」

「你會唔會做傻事架？咪呀你，會累死我架。」

我向余生解釋咗幫佢瞓覺嗰陣，如果佢死咗，我嘅意識都會被虛無呑噬。





「唔會啦，係要做傻事一早做咗啦。唔開心咪上下連登，笑下又一日。」

余生轉身入房，將要改嘅簿搬哂出去廳嘅飯枱。之後再拎枕頭同被放喺梳化上面，整好準備畀我瞓。

「拜託你喇。」

我同余生訂立契約，勾手指尾。