是咁的，我嘅職業係幫人瞓覺: 一百零九、老人痴呆

「我幫你瞓覺嗰陣，發咗個夢。夢入面不停重複我同你見面，直到我幫伯母訂立契約嘅片段。」

播咗六萬九千七百二十一次，但當中無任何一次，係我成功幫到恆媽瞓覺，令佢地可以再好好咁傾最後一次計。

「其實，就算成功，我都未必可以同到媽咪好好咁傾計。」

「點解咁講？」

「媽咪有老人痴呆症，就算我同佢講一齊做過咩事，佢都唔記得。無論我講咩，佢嘅回應都會係一個問題。」





媽呀，食橙吖。

點解你叫我阿媽嘅？我有仔架咩？

媽咪，許冠傑演唱會嘅碟呀，鍾唔鍾意呀？

乜原來我⋯⋯鍾意許冠傑架？

媽咪！你冷靜啲，做咩事？冷靜啲！





我唔見我個仔呀！你⋯⋯你係邊個？做咩喺我屋企呀你？

媽⋯⋯我喺度呀⋯⋯

陰公囉，唔好喊呀下，嬸嬸帶你去搵媽咪好無？