是咁的，我嘅職業係幫人瞓覺: 八十三、真話

「幫你瞓覺嗰陣，我喺你潛意識嘅世界見到你嘅良心。」

我同阿婷講，佢嘅良心因愛而生，雖然唔自覺，但佢係因為真係鍾意阿朗，先會有罪疚感。

不過阿婷一直都唔知，唔知自己愛嘅係阿朗，唔知自己擁有咗良心，唔知自己點解唔開心，甚至唔知自己內疚⋯⋯

唔了解自己嘅人，係唔會有幸福。

就算曾經擁有，都被自己一手一腳破壞。





人習慣咗用肉眼去睇世界，但只有用心去睇世界嘅人，先會知自己真正重視嘅人係邊個，真正著緊嘅事係乜野。

阿婷嘅面色，愈聽愈沉，眉頭深鎖。

我知道我講嘅野令阿婷嘅表意識有反應，但與此同時，婷婷都喺內部搞亂緊阿婷嘅情緒。

歌播完，阿婷瞄一瞄手機。

「你依家嘅感覺，就係內疚。我諗，佢一直喺度等你句真話。」





雖然阿朗信唔信，又或者真相對佢嚟講已經唔重要，但良心要我地做嘅事，從來都係求對得住自己。

重點唔係對方相唔相信，而係我地自己，應該講真話。