是咁的，我嘅職業係幫人瞓覺: 四十五、婷婷係咩嚟？

「幫我？」婷婷好奇咁瞪大眼望向我，兩個問號喺佢頭上彈下彈下咁。

「比如你有咩想同阿婷講呀，我可以幫你講佢聽。我睇得出你兩個諗嘅野好唔同，不過你又無辦法將你諗嘅野傳遞畀阿婷知，既然係咁，我幫你講咪得。」

人嘅潛意識理論上係主宰我地行動嘅最主要原因。

有好多我地唔自覺嘅決定其實同潛意識有關，比如我地愛上咩人，基本上都係由潛意識嚟決定。

所以就產生一個問題，如果婷婷係潛意識嘅代表，佢應該可以影響阿婷嘅行動。咁就算阿婷搞到夢世界一片死寂，婷婷都無理由嬲受自己控制行事嘅阿婷。





一個細路玩遙控機械人撞爛野，點會係機械人嘅錯？

除非佢控制唔到個機械人。

潛意識可以控制人嘅活動。

婷婷控制唔到阿婷嘅活動。

依個細路女唔係阿婷潛意識嘅代表。





咁婷婷到底係乜野嚟？