《失落．彼岸：在咖啡冷掉之前忘記你》【奇幻】【愛情】: 第五章：飄然而至的惡意01

上載這段影片的網頁很陌生，似乎是個私人網站。


短片聲情並茂，有很多選了最醜的角度來偷拍的照片，還特地配了音，隨着影片一邊播放，阿本就越加憤怒：


《隨意消費的回憶，隨便丟棄的紀念》


是咁的，大家都知我一直都好鍾意飲咖啡，之前聽到朋友講話呢度有間隱世咖啡店，主打咩故事咖啡，早排仲出咗個專欄添，好多人睇、好受歡迎咁話。咁身為咖啡痴嘅我就梗係要去睇吓咩料啦，點知一睇之下就出事喇！

是咁的，我一入到去，嘩，鬼影都冇隻，啲燈光又暗、裝修得又唔靚，真係完全冇氣氛可言囉！


周圍擺滿咗好多所謂陳列品，都只不過係一啲好常見嘅紀念日產品，咩DIY小手作呀、銀包呀、手袋呀嗰啲咁啦。


咁我就求其揾左張枱坐低啦，樓面個侍應黑哂口面咁，真係見到都唔開胃。不過，既然都一場嚟到，無論點都要試番杯故事咖啡嘅。

杯嘢飲一嚟到，嘩大佬，一杯凍齋啡改埋哂啲奇怪名都唔會變得高級啲㗎，仲要話佢啲冰係用唔知咩貴價靚酒整嘅，我呢啲粗人就真係唔識貨，恕我無福消受喇。


佢啲所謂故仔就仲誇張，唔係我口響，俾番半粒鐘我我都諗得出啦，喂大佬俾啲誠意好喎！


本身呢，都冇打算講出嚟嘅，心諗當佢係一間用啲懶係有gimmick嘅嘢嚟包裝吓嘅café就算啦，點知後尾收到讀者爆料，我一聽就真係忍唔住，一定要將佢啲衰嘢爆哂出嚟。

March（化名）同我講話佢曾經都喺呢間嘢度做過，佢哋入職嗰陣就好搞笑嘅，話咩要同佢哋治療情傷，叫佢哋準備一樣同上一段戀情有關嘅嘢，加埋佢哋之間嘅故事去見工（我心諗原來啲故仔同裝飾品就係咁嚟嘅，連作故仔嘅時間都慳番，你都得㗎喇你）。


March話一直都冇乜嘢㗎，但唔知點解突然有一日個店主就無啦啦炒鬼咗佢魷魚，之後佢想要番件寄存品嘅時候，詭異嘅事就嚟喇，個店主就推呢樣推嗰樣，總之就唔俾番佢啦。


本身March佢都忙緊其他嘢，諗住算啦，反正回憶嘅嘢冇咗咪當冇咗。點知有次上到去間店竟然冇人，跟手仲俾佢發現到個店主竟然將之前嘅寄存品當垃圾咁放喺個爛鬼玻璃箱就算。


嗱嗱嗱，大家睇真啲呀，就係呢個箱喇，真係亂咁擺哂入去㗎咋。我嗰吓就真係着哂，你求財我都算，喂人地啲嘢真係有紀念價值㗎嘛，你咁樣隨手放埋一堆咁算點先，好心你消費完人地嘅故仔，就將件嘢俾番人啦，留番嚟煲醋咩。


總之今次我就真係好睇唔順眼㗎喇，大家都知我好少斷人米路嘅，但今次就真係忍唔到囉！

大家千祈唔好再幫襯呢間乜鬼忘咖啡店呀，又呃錢又冇良心！


影片是昨晚上載的，觀看人數卻已上十萬，留言也已累積過萬了。阿本看完影片，再接下去看網民的留言：

……






影片下的留言，全部都是一面倒地指責桂晨，說話難聽至極，還有很多明顯是隨意捏造的、不負責任的說話。


「崔大少，別只顧着看呀，說點甚麼吧？」上司不住地催促。