《純愛》平安夜的天使 (完): 第八十三章

第八十三章

「啊～好耐無飲喇～味道仲係同以前一樣～」

「今次真係算好彩，平時7仔都買唔到㗎⋯」

一切都真相大白之後，我哋一齊坐咗喺課室入面，睇住窗外嘅遠景，同之前唔同嘅係，有一部分樹木已經俾啲新起嘅高樓大廈覆蓋住，難免有啲大煞風景⋯

Lavina：「因為要起樓而犧牲咗呢一帶嘅美景，真心好可惜⋯」





我：「不過，呢到將來呢到都會變成做綠化公園，俾啲細路享受快樂嘅童年，都唔差呀⋯」

Lavina：「都係嘅⋯ 只可以留咗心中囉⋯」

我：「不如我哋影返幾張相留為紀念囉，咁樣起碼遲啲黎唔到，都有嘢頂住，無咁難受～」

Lavina：「我一早影咗啦，嗱～」佢俾咗佢啲相俾我睇，但⋯

我：「喂，姐姐⋯唔係求其拎部電話出黎影就叫影相㗎喎⋯妳自己睇下喇⋯」佢有兩張相係化開哂，一張朦到唔知乜咁⋯唉⋯





Lavina：「呵呵～咁你黎幫我影喇～」

我：「咁妳坐住喺到先⋯」我攞出我部電話，半蹲咁對住曉桐，呢一刻陽光再次照耀喺我哋身上，幫我營造咗一個好風和日麗嘅美景⋯

「咔嚓～」

Lavina：「攞黎睇下～」佢一嘢側過黎我側邊
「好靚呀～邊個教你影相㗎？」

我：「俾人嬲出黎㗎⋯」我哋雖然唔po相係啲社交平台到，但都好常影相⋯而以前Kelsey成日話我影得佢好矮，所以每次影相都要被迫罰跪⋯不過，只要影嘅係佢，我心甘命抵嘅⋯





Lavina：「喂，唔好只影我一個，我哋不如黎張自拍啦～」

我：「吓⋯唔好喇掛⋯我咁樣衰～」

Lavina：「咁樣衰配靚女，咁樣衰嘅就更樣衰，靚嘅就更靚囉～」

我：「咁又係⋯喂唔係喎！妳咪啫係話我樣衰！」

Lavina：「哈哈～反應咁遲鈍都有嘅～」

我：「妳過黎，黎俾哥哥教訓教訓下～」佢即刻跑開
「黎啦～我樣衰吖嘛～黎幫我變返做靚仔啦～」

Lavina：「哈哈～救命呀～有變態佬呀～」





「叮噹～叮噹～」耳熟能詳嘅鐘聲徐徐響起，將我哋拉回現實當中

我：「原來已經咁晏㗎喇⋯」

Lavina：「學校就閂門喇，我哋快啲影埋相走人啦。我好肚餓呀～」

我：「唉⋯快啲過黎啦～」

Lavina：「你唔會對我做啲㗎下話？」

我：「妳再講我就真係會。」

Lavina：「okok～黎～」





「3。」

「2。」

呢刻嘅我，終於搵到自己嘅快樂。

「1。」

「咔嚓～」

「鏡頭內嘅影像並唔能夠替代人嘅眼睛。與其影黎留念，倒不如好好用雙眼去好好細看呢個世界。」