《純愛》平安夜的天使 (完): 第七十一章

第七十一章

「係呢阿遊呀，你大後日可唔可以幫我同你攞一日假呀？」

「嗯⋯ok嘅⋯做咩呀？」

喺食完個下午茶餐之後，我哋見仲有少少時間，所以就去咗cafe附近間商場行下，呢個商場都係啱啱政府買咗塊地所以先起嘅，我都係第一次行⋯一入到去，仲有嗰股濃烈嘅天拿水同油漆味，但都已經有店商入伙做生意，如果呢個商場喺兩年前就起咗嘅話，我諗我哋生意難做了⋯

Lavina：「無～想拉你返一返去小學啫～」





我：「吓？做咩咁突然要返小學呀？」

Lavina：「睇新聞報導話我哋以前讀嗰間小學下個月就拆喇⋯所以咪想盡快返去睇下囉⋯」見到佢講呢句嘢嘅時候面有難色，咁又係嘅⋯佢想返卻返唔到，一直喺紐西蘭，想探都探唔到。而我自從升咗中學之後都無再返過去小學探校。因為我唔想勾起啲唔好嘅回憶，同埋Angel都已經唔喺到，我都無返去嘅必要⋯但現加妳再次喺我生命中出現，我諗都算係對我一個提示⋯如果唔係，我諗呢佢已經拆咗我都唔會知⋯ 到時想後悔都無用⋯

我：「間小學竟然出名到要登報咩？」當年入呢間係我阿媽揀嘅，所以我讀完就算，無理佢有啲咩歷史背景⋯

Lavina：「篇報導寫話學校長期無政府資助維修同教育支援，導致日久失修同無老師去應徵，所以最後仲宣布拆遷，原本塊地會攞黎起公園做綠化用途喎～」

我：「政府講啲嘢妳又信嘅？」





Lavina：「咁報紙上面係咁寫吖嘛⋯唔講呢啲住先喇，咁你係咪去啫030」佢嘟起個嘴嘅時候，我見到啱啱份西多啲牛油喺佢個嘴角到，而我就一個慣性動作，就攞咗張紙巾幫佢抹嘴⋯
「做⋯做咩你呀？」

我：「幫妳抹嘴囉小朋友～成廿歲人連嘴都唔抹乾淨～」

Lavina：「唔⋯唔該⋯」佢講完就面變得好紅，每次怕羞嘅時候都係咁⋯搞到我都有啲唔係太好意思⋯

我：「係⋯係咪要返小學呀？係就等間同Priscilla講聲喇～」我嘗試開新話題黎分散下佢嘅注意力

Lavina：「咁⋯好啦！咁嗰日幾點呀？」





我：「妳話事啦。唔好太早就得喇～」

Lavina：「知道喇懶瞓豬～」

我：「唔好咁講自己～」

Lavina：「喂呀！阿遊又蝦我030」

我：「咁⋯咁都叫蝦⋯」

Lavina：「我唔理，我要你孭我返cafe～」

我：「吓⋯佢哋喺到㗎喎～」





Lavina：「放心啦～我會喺臨到cafe之前落地嘅～」

我：「唉⋯聽住先⋯」


「每次回想起那悲傷之地，難免會喚醒返當年嘅痛，但亦代表自己曾經有愛過⋯」