《純愛》平安夜的天使 (完): 第一章

第一章

我個名叫做何永遊，英文名叫Marcus，今年24歲，兩年前喺HKU畢業。24歲嘅人生，本來應該同往常一樣又頹又平淡，直到我喺嗰年平安夜遇到一位天使，正確啲黎講，係一個攞住香檳扮關公嘅天使⋯

12月24日，平安夜。我一個人喺尖沙咀天星碼頭遊蕩。睇到啲人差唔多個個成雙成對，有講有笑，周圍都佈置咗閃耀嘅聖誕燈飾，佢哋面上亦留下咗幸福嘅印記，我就好似唔屬於呢到咁，所以都難免有啲心酸⋯嗱！唔好以為我冇人約，我有㗎！但就冇去到。因為我已經唔敢再俾自己機會去愛下一個人，我仲係好愛佢⋯

行到十一點嘅時候，我靜靜喺其中一張木凳到坐低咗，眯埋雙眼，諗住一邊感受冷冽嘅海風喺我面上掠過，一邊等待聖誕嘅來臨⋯⋯就係呢個時候，我突然間聽到海邊有個女仔大叫：「點解我仲未遇到愛我的男人呀！你班死臭兵！叫你哋死開九尺遠又唔聽！一見我係女就雞咁腳衝埋黎！死開呀！」

我見到佢攞住支香檳，身高一六幾到，佢著住一件白色針織冷衫，同一條淺藍色百摺短裙，塊面紅過關公。佢係咁對住個海揮支香檳，當正自己關公上身咁。我心諗：「無嘢呀⋯發酒癲都唔係咁呀⋯」





當我仲諗緊佢枝香檳係點黎嘅時候，佢已經用迅雷不及掩耳嘅速度行到欄桿旁邊，爬咗上去，仲做埋個跳水姿勢。換著平時我就由佢跳嘅，反正都唔關我事。但呢刻我對腳好唔聽使咁自己衝咗埋去，佢聽到後面有人跑緊過黎，就下意識向後望，於是我就話⋯

我：「啊小姐！自殺唔會幫妳提早等到妳想等嘅男人㗎喎！不如落返黎俾我幫下妳呀！」

我到而家都唔知自己點解會咁講⋯點知佢聽到就喺到大笑！

我嚇咗一嚇⋯佢唔會真係癲㗎下話⋯之後佢話⋯

？：「我伸懶腰啫，洗唔洗咁驚呀？我呀⋯我⋯ 」之後佢就無端端開始喊啦。我望住眼淚浸濕佢修長嘅睫毛，停咗幾秒，都係攞咗張紙布俾佢。





過咗一陣，佢帶住哭腔咁問⋯
?：「唔該⋯⋯點解你會走過黎嘅？」

佢向右傾頭咁望住我，我有啲唔自在咁將雙手放喺腦後，好心虛地答佢（內心OS：我原本唔想過黎㗎）：「哦⋯咁我見有女仔唔開心吖嘛，所以我咪過黎陪妳囉！哈哈⋯係呢，唔知妳點稱呼呢？我叫Marcus。」

？：「 Mars？（正常人聽到我個名嘅第一反應）我叫Lavina。」

我心諗：「嘩⋯個名難讀到呀⋯」不過我當然無咁講啦！

我：「哦⋯咁名咁特別嘅。邊個幫妳改嘎？」





如是者，我哋喺海邊傾咗個半鐘。
Lavina：「係喎⋯ 點解你一個人嘅？你又唔係樣衰呀～帶著副黑框眼鏡，衣著又無咩問題，幾斯文呀。唔似會無女喎！幾可疑喎⋯⋯講！你係咪想溝我！」

我：「係呀信唔信！唉⋯ 唔怕同妳講埋啦！我以前有一個女朋友，佢叫Kelsey，係我生命入面最重要嘅女人。佢係我心中的完美理想型。佢戴住一副黑框眼鏡，身高158，同有180嘅我喺身高上形成好大的對比。好多人話佢樣貌一般，但係喺我眼中，佢係最靚，佢面上嘅baby fat真係好可愛。我哋好愛對方，由始至終都係，直到⋯⋯」

講到呢度，我嘅聲線開始沙啞，雖然都過咗兩年幾，但我從來未放低過⋯但我想眯埋眼去忍住嘅時候，我感覺到嘴唇一股溫暖而濕潤的感覺⋯嗰股好似曾相識的感覺，令我諗返起當時同Kelsey的回憶。我即刻擘大咗對眼，就同Lavina對上咗目光，仲好清楚咁見到佢面上嘅淚珠。我嚇到一嘢喺鐵欄上跌咗落地，真係諗起都痛呀⋯
Lavina：「錫一啖啫，洗唔洗咁呀？」

原來Lavina錫咗我⋯同一個淨係識咗個半個鐘嘅女仔接吻係好奇怪嘅一件事⋯但我個心就難得咁平靜咗。我一起返身，就同佢講⋯⋯

我：「小⋯小姐，都夜㗎喇，不如我送妳返去呀。」

Lavina：「好呀，但我想瞓一陣先。」





之後佢都落埋黎，然後我哋就一齊行咗去地鐵站，隨便搵咗張長凳坐。我本來諗住陪到佢酒醒返先走嘅，但可能因為太夜嘅關係，結果我自己都瞓埋⋯


「人生有無數讓你始料未及的事，由此刻開始，好好期待吧。」