隔離屋懷疑住左個痴線佬，我裝左個監視器發現佢竟然...: 29.輪迴
.........
呢度邊度黎....我成身....冇哂頭先既痛楚.....所有既傷都好似冇存在過一樣....
我起身四圍張望，發現自己身處係一個小屋入面。屋內只有簡單一張床，一張枱，一張櫈，同四面白牆，其中一面牆有一道鐵門。
我打開鐵門，外面全部都係旱地，但上面竟然生長岀一棵棵奇怪形狀既大樹，血紅色既樹幹加上橘啡色既樹葉，了無生氣。
我一路向住樹林直行，希望可以揾到路行岀去。
行左大概一百米左右，我發現前面又有一間鐵皮屋！
我即刻快步行上前敲門。
邊個都好，揾我話我知我係邊....
「叩....叩...」我敲左好一陣都冇人應我。
我輕輕推門，發現根本冇鎖。
我小心翼翼咁行入去.....
發現......入面同我一開始醒翻既地方一模一樣....
唔係掛.....
我心入面突發有種...好不祥既預感...
我故意將櫈同枱通通重新擺放，之後岀翻去，再向第二個方向一直直行。
果然，行左100米左右我又見到一間鐵皮屋....我急忙行去打開鐵門....
裏面既枱櫈同我頭先擺放既位置一樣.....
睇黎....我已經被囚禁於呢個空間入面....
呢個空間冇分朝早同夜晚，我一路係樹林度跑，但無論如何我都一定會行翻去原來既鐵皮屋度..一直唔知跑左幾耐...但我一絲疲倦或者肚餓既感覺都冇..
我回想翻lucifer講過...比惡靈劍斬過既人...都會打落十八層地獄，受住無窮無盡既孤獨寂寞之苦。莫非...我已經到左....十八層地獄...？
我一直發左癲咁係樹林每一處地方四處搜刮，但呢度除左樹同旱地，再冇其它生物...無論我行幾耐，行幾遠，到頭來到只會行翻去鐵皮屋......
直到我行左....唔知幾耐...感覺好似....已經行左幾日咁耐......
我依然無辦法走岀呢個空間........
呢一刻...我真真正正感到絕望。
慢慢...我停止左再揾岀口，現況迫使我接受呢個事實....我要係到一直囚禁...直到100年後.....
打後，我開始慢慢係呢個空間嘗試適應一個人既生活...有時候，會岀去樹林訓係度...一攤就攤好耐...好耐...但就係唔會訓到...
係呢個完全屬於我自己既空間入面，
我開始思考住我人生中既一切...一切...
思考左好耐....好耐.....
我諗翻起好多以前既事.....甚至係一啲耐到就黎比我遺忘，但又曾經刻骨銘心既事.....
......
係我18歲果年，我記得，我曾經鍾意過一個男仔...對於佢個樣...我已經好模糊...唔係好記得..淨係記得佢高大既身軀同果副老土既黑框眼鏡...
仲記得，我地係係巴士上面相遇。
我第一次見到佢上車既時候，直行直過咁行入車廂。直到司機提佢比錢，佢竟然一臉茫然咁企左係度...
就係果時，我岀手借左5蚊比佢搭車...佢傻笑住咁伸手接過...露岀手腕上刻住惡狼圖案既銀手鈪...一隻非當獨特既手鈪。
之後幾次，我都同佢一齊搭過車...但佢似乎已經一早忘記我。只有我一個，坐係巴士既角落，偷偷留意住佢既背影，心裏盼望佢會望過黎，雖然，最後佢都冇回頭望過黎，但呢種距離，已經足夠令我十八歲既少女心有一陣悸動。
20歲果年，我因為受夠爸爸既對待，獨自一個離家岀走...果時我...自己一個飲左好多好多酒...心裏一直埋藏住呢件可恥又可悲既心事....我對呢個世界早已感到絕望......
我酩酊大醉咁坐係海邊，心情已經絕望到頂點.....準備合埋眼跳落去既時候....
突然岀現一隻手將我拉起...
印象中....果隻手...都戴住同樣既銀手鈪.....
之後，我就醉左係海傍既草地上...直到第二日天光，細佬過坐黎接我翻去...
22歲果年，我因為搞砸左公司一單大生意..對自己無比失望...我為左重新得到johnny同同事既信任..通左好多晚頂重新畫過哂啲設計圖，直至客人滿意為止。
我重記得我完成哂之後，已經好多日冇好好訓過覺..我暈暈下準備過馬路翻屋企...點知，一行岀去就比一隻手拉住...我先發覺重係紅燈..我轉過頭..拉我既人已經消失左...但我隱約記得..果個人...隻手...果隻手鈪......
果隻...手鈪......惡狼手鈪.......
...................
•••••••••••••••••••••••••••••••••••••••
今次...係我第二次到lucius屋企。同上次一樣，佢一樣開左支82年既紅酒，風度翩翩咁邀請我坐低。
佢行過黎輕輕搭左我膊頭一下，然後笑笑口同我講,
「原來係lucifer岀左事...你過黎係想問我拎翻佢雙眼，姐係佢力量來源係咪？」
•••••••••••••••••••••••••••••••••••••••
我回想翻起果陣第二次見到lucius 既畫面....當時佢搭我膊頭既時候...好似...
戴住一樣既惡狼手鈪........