隔離屋懷疑住左個痴線佬，我裝左個監視器發現佢竟然...: 17.商業奇才

lucius求其煮左啲晚餐比我食之後，我地就開始商量點樣追翻啲合約。

「你之前一直係點樣拎啲合約？」我一直都想問佢好耐，兩兄弟都有特別能力，但合約數量就差咁遠。

「第一，我冇拖拍，每一日我都全心全意專注工作。
第二，我唔單止自己一個去揾客人。我同時有請人，去專門揾啲需要唔同服務既客人。例如要幫手追女，報仇，尋人果啲要求都會接。
重有就係..我會盡量放大簽約既好處，將壞處減到最低。」

「點減到最低？」



「有冇簽過有線份約呀？」

我搖搖頭。

「所以就話你，頭髮長見識短。任何一個成功既商人，都一定會由有線攻略學起。

一開始比個客簽既時候，一定要比幾十頁水蛇春咁長既條款比佢望，最重點最mean既條款當然要隱藏係最中間，冇人留意果頁。

之後就用你既三寸不爛之舌去說服佢，講到晚晚有波睇，又有機頂盒送咁，送得越多個客就越動搖，會不自覺將合約既利益放到最大而忽略左弊處。



然後，迫佢簽完幾年約，我地就要露岀真面目。免費機頂盒就收佢老未安裝費，想睇波就去收費台，唔係就比雪花佢睇。呢樣就係啲客冇睇清楚條款簽約既後果。

到完哂約，就係call center發功既時候。想cut有線既永遠cut唔撚到，未續約既就晚晚奪命追魂call，係一站式既疲累轟炸下，長年累月個客都慢慢開始懷疑人生，覺得續約係自己唯一既岀路。

如果一間公司做齊呢三個有線式step，基本上發展潛力都十拿九穩咁安全。」

lucius一講起做生意就滔滔不絕，真係唔簡單。

「所以....我地都照版煮碗，將合約包裝到非常超值咁吸引人去簽！
咁我地可以點揾到呢班人？」



lucius諗左一陣，答我:「可以試下social media，我地可以研發個website或者開個app，去吸引所有有需要幫助既顧客！」

聽落真係幾得！social media個市場咁大，短期內揾到千幾個客都唔係無可能！

「lucius！你真係商業奇才黎！

我都已經諗好我地app叫咩名好.

一於叫「NII萬事部」

Nothing is impossible!」

lucius見到我有翻活力，都附和下我:



「雖然個名有啲老套，不過橋唔怕舊，一於我地拍住上！將失去既賺翻翻黎！」


打後個星期，我同lucius都為我地既新計劃日以繼夜，再夜以繼日咁做準備。我幫手諗成個website同app既設計同宣傳，lucius就負責用佢淨翻既資金，打算物色一個單位做公司，順手請人去寫app同website，而且重諗哂之後每份合約既條款細則。

「估唔到你連呢啲法律野都識...」我不禁暗暗佩服lucius既能力。

「之前我睇過咁多份約，唔多唔少都識啲既。講開，我有錢果陣不知幾多女人想釣我，不過我每次讀完佢地啲記憶，有9成都係已經屎眼都俾人開發埋，淨翻1成就上哂年紀想揾人埋單。睇得多都覺得好厭。」

「所以話，有時有啲野唔知好過知。好似我冇左讀心能力之後，反而對人留翻啲神秘感。咩都睇穿哂，人生都幾無趣。」我苦笑咁答佢，有時，有能力既人比凡人更加體會到呢個世界既可笑。

到第二個星期，我地個NII萬事部app同website已經完成，而且已經租左個地方做呢門生意。我同lucius見所有野想準備好，即刻開始俾錢揾人宣傳。

「一於揾鳩假期同200毛啦，呢兩個page最大既特色就係冇特色，夠哂大眾化，應該足夠引班盲毛過黎。」



好彩lucius之前係商界都算有過名氣，又識到唔少生意上既朋友，宣傳呢單野，好快已經傳開去，已經唔少人down左我地個app同like左我地webpage。

今日，終於到左我地新公司開張既第一日。我隻腳都好左6,7成，行起上黎已經冇之前咁痛。lucius扶住我，一步一步行上我地既新公司。

突然間，lucius靠近我耳邊細細聲咁講:
「美玉，我見到，已經有12個人排左係我地公司門口揾我地幫手。」

第一日就已經...12個？

我笑住咁捉住lucius，一齊開啟公司既大門。