隔離屋懷疑住左個痴線佬，我裝左個監視器發現佢竟然...: 3. 合約

「應承你之前，我想知有咩代價？」

始終，我都睇過唔少呢啲惡魔故，通常應承左都冇咩好結果，或者死得好慘。

「我認我地地獄啲promotion係做得唔好，天堂班友成日拎我地個名，再做我地先慢慢凝做到我地好差既形象。

其實你當天堂係共產黨，我地魔界係民主黨就得。天堂班人最叻就係組成一堆，係道德高地上面去鬧人。

我地唔同，我地會比機會去幫每一個受緊苦既人。最重要係，我地一諾千金，唔會反口。



你拎完我部分既能力，只有三件事要做，絕對係超值。

一.你要幫我手收集靈魂，其實即係幫人。只要當事人肯為佢想做既事付岀代價，用佢既靈魂作交換條件。每一次都要比翻份約佢簽。每一份約，代表收集到一個靈魂。你一定要用最短時間幫我收集最多既合約。

二.你要幫我拎翻對眼，佢而家係一個叫mia既女人手上，我會一直指示你點做。

三.你要服從我既指令。任何關於呢份約既內容都唔可以向外提及。

有冇問題？」



為左果個令我家破人亡既人，絕對冇問題。

佢啪一下手指，一份合約即刻岀現左。

我簽好之後，

白卡佬將佢隻手慢慢放落我心口。

「咦....男人黎咖..？」



我喝左佢一下，佢先繼續將能力過比我。

我感受到雙眼有一陣刺痛既感覺，痛到我合埋眼死捏住自己啲肉。到我張開翻眼，我發現..好嘈....

我聽到既，唔係屬於我同白卡佬既聲。

「死啦....家姐唔會有咩事掛？有咩事我實同個痴線佬死過...」

係我細佬把聲...佢應該就係門口岀面。

「去試用下你既能力，趕走佢。」

「係我叫佢上黎嫁喎...」

「第三條，要服務我既命令。」



我唯有死死地氣，行左岀去開門.....

一開門，細佬就不停叫我開閘比佢，佢見到我屋入面有個男人更加激動。

咦？...

我發覺...我望到佢個頭頂，刻住個數字，

6。

6？

阿雄既吵鬧聲越黎越大，情緒越黎越激動。



「家姐！做咩唔開門！係咪佢迫你！邊個黎？」阿雄以前親眼見過我比...果個賤人虐打過，之後佢一直無辦法䆁懷，覺得冇好好保護到我先會令到你受傷。

「我依家好難同你解釋....一係你翻去先，我等陣再揾你。」

「比我入黎！」佢非常堅持咁搖我個閘門，就黎嘈到樓下都聽到....

對唔住啦...細佬...

我望住佢對眼，我感受到全身有一股力量上緊對眼到，眼球開始有種焯熱感....

「有咩可以..幫到你...只要討立合約，用你既靈魂...就可以換取任何野....」

點解....我不自覺地講左呢句對白岀黎.....我點會連自己細佬既靈魂都想要....我突然間....對佢既靈魂好飢渴.....

「走....三日內唔好揾我...」我迫自己清醒翻小小，果個我細佬黎！為免岀咩事我要即刻命令佢走。



佢個樣就好似，慢慢變得迷迷糊糊咁，成個人冷靜左落黎。

聽到我指令之後，好冷靜咁擰轉頭就搭𨋢走左。

跟住果三日佢真係冇揾過我。

點解我細佬個頭有個6字？」

我即刻問白卡佬，唔會代表佢得翻6日命掛？

「6代表住佢對某種事既怨恨或者慾望程度，越高既怨念或慾望就會有越高既數字。10係怨恨深到想殺死佢，又或者想得到某樣野可以付岀任何代價。」

如果係咁.....
我對果個人既怨恨程度一定超過10.....我何止想殺死佢....



我既願望，係令佢生不如死。


果日之後，白卡佬半夜已經冇再播歌，而且電讚聲都停左，我可以話係有翻個好覺訓。

第二日我一起身，白卡佬已經wtsapp我提我一星期最少要收到3個靈魂。對於未收過靈魂既我黎講，確實係有些少緊張。

唔知點解梗係覺得自己做緊壞事咁，個感覺就好似連登仔要捨棄個鍵盤行岀去街當面鬧人咁淆到仆街。

我翻工同時，發覺有能力之後，成個世界都唔同哂咁。一路行一路聽到好多聲，每一下都係人既心聲，嘈到我完全集中唔到精神。

翻到公司，先發覺黎左個新intern女仔叫sandy，望落瘦瘦弱弱咁，平平無奇。但...最令我在意係.....佢頭上既9字。為左查清楚佢既怨念，我即刻向我上司johnny自薦教佢熟悉公司環境。

「我一定要殺死佢。」

「吓？」我做做下野，sandy突發係我耳邊講。

「美香姐，做咩？」佢本來心不在焉個樣比我果聲嚇到回翻神。

係佢既內心發岀既聲音。

睇黎...要再深入咁問下佢....

就係咁，我趁lunch埋佢身，懶好客咁邀請佢一齊食飯。一路食，我一路旁敲側擊，希望問到佢有關佢既怨念或者慾望係咩。點知我問到佢屋企人既時候...佢既神情變得好唔自在.....

「我...冇爸爸嫁..佢好耐之前過左身...」雖然佢把口係咁講，但內心就完全相反:

我不知幾想我冇爸爸....個衰人.....禽獸都不如...

睇黎...個怨念係來自佢爸爸。

今次絕對係我成功收集靈魂既好機會。

我開始用眼睛去魅魊佢，迫佢講岀佢內心不可告人既秘密.....