漆黑中的螢火蟲 (甜): 幸福

「無謂同錢作對，都係一晚半晚姐」我嘗試說服自己。我係衣櫃揀左一套黑色lace既內衣褲，本為C級既胸部因為push up bra顯得更澎拜，露出一條好深既乳溝，再配上一條黑色低胸連身短裙加黑色高跟鞋，更顯我美腿又白又長。全黑既性感造型相信一定令果位張主席好滿意。

盛裝準備後，我準時去到餐廳，餐廳內空無一人，富豪包場都好正常既，話唔定就想係餐廳將我就地正法。只見有位一臉正氣，官仔骨骨既後生仔笑住向我揮手，但我唔識佢喎...

「Hello! Jessica! 我叫Eric，係張氏集團既營運總監，果晚annual dinner見過架啦....」原來係張主席個仔，真係睇唔出條老淫蟲會生得出一個咁正派既仔喎，果晚都無留意到添，不過算啦約得我出黎都係有哂佢老豆既基因，就睇你幾時上我！

Eric自我介紹完後，就不停同我分享佢自己既野，又話自己係英國名校畢業，返到黎香港無耐，又分享自己既嗜好，鐘意食乜，成餐飯都無停過。不過都無所謂既，聽下你講野又有錢收，不過想搞就唔該快d，老娘趕住收工！

食完飯之後，Eric就車左我返屋企，臨走前只係俾左個goodbye kiss我，我真係完全唔識反應，俾幾皮野我食餐飯傾下計，有錢人既想法真係好難捉摸！



隨後既日子，Eric都不停約我出黎食飯，而且每次都俾足錢，開頭見條水魚咁順攤，齋食飯手仔都唔摸，我梗係應承！但食過幾次飯之後，我發現佢個人真係幾正經，同我傾計又目不斜視，不論我著幾暴露，佢都完全無咸濕我既意慾，我漸漸對佢產生好感。但我清楚知道自己係無可能同佢一齊，我呢d不三不四既女人，好聽就明星收錢陪坐，其實就係賣肉既高級妓女，今日佢唔開我波，唔代表下次唔會，我要清楚我地之間只係交易，係唔會有感情。

但相處耐左，我好似真係鐘意左佢，我經常都好期待佢幾時打黎約我，好想見到佢。直到有一日，佢直接打黎話想見我，問今次唔俾錢得唔得，我諗都無諗即刻答應。

又去返第一次見佢既餐廳，一樣係無哂人，只有Eric一個，同樣地佢笑住同我揮手，感覺好熟悉。就好似平時約會咁，我地傾左好多心事，同佢一齊感覺好舒服，好開心，好耐都無試過有男人俾到呢種感覺我。

「Jessica，同你一齊好開心，但我唔想再俾錢去買開心啦，用錢買返黎既根本唔係真正既快樂！」Eric突然好認真咁講，係呢刻我知道快樂既日子要結束了，美好既時光總係特別短暫，唔緊要，至少我開心過。我答佢明白，但淚水不斷流，唔止係面上，心裡都一直咁流。

突然Eric跪低，係衫袋拎出介指：「Jessica你嫁俾我，我係真心鐘意你！可能錢對你黎講好重要，所以我不斷咁約你出黎俾錢你，我知道你為左錢有去陪其他老細，但我唔介意你既過去，我希望你以後只係陪我一個，我會令你明白錢係唔會令你幸福！」我已經喊到收唔到聲，真係估唔到呢個世上仲會有男人鐘意我呢個不潔既女人，我即刻攬住Eric，攬住我既幸福，攬住我既將來。



係一個平靜既晚上，我過左一生中最不平凡既夜晚，我永遠都會記住呢一刻，我愛你，Eric。