漆黑中的螢火蟲 (甜): 演藝事業

同Tony既歡愉時間過得特別快，肉體上雖有快感，但始終都唔係我真正想要既野，好快我地就分左手。過左無耐，我就參加左電視台舉辦既選美大賽，自信滿滿既我係大熱姿態下擊敗眾多佳麗，奪得冠軍。

重溫住得獎片段，我不禁欣賞自己既美貌同表現，亦覺得個獎係非我莫屬。我有樣有學歷，美貌與智慧並重，相信一定會好快走紅，成為紅遍亞洲既女星。

幻想總是美好，隨住日子過去，我每日都係電視台拍劇做二三線既角色，收入低微。好彩經理人幫我接左d廣告，出席下活動，既可增加曝光率，又可以增加收入，總算夠糊口養家。

我無因此而氣餒，我每日都會一邊拍劇，一邊學習前輩們既演技，我亦有主動埋堆去討好大家，希望可以爭取做重要角色既機會。有一日，我係電視台遇到我既偶像Alan Tam。Alan同哥哥係當代最紅既歌手，譚張之爭成為華人地區一時既佳話。作為Alan 既fans，我主動走上前問佢拎簽名，Alan真係好好，仲同我打氣叫我努力，仲送左佢最新既cd俾我！不愧係我男神！

受到Alan既鼓勵，往後日子我更加努力拍劇，盡心做好每個角色，希望得到導演同觀眾既賞識。可惜事與願遺，做左一年有多，甚至我交棒俾下一任既選美冠軍後，我仍然係做緊二三線既角色，亦無乜傳媒會報導我既新聞。



自小我想得到既事從來都會得到，但娛樂圈並唔係我諗得咁簡單。講樣講身材，無錯我係最top果批，但圈內確有唔少擁有呢d條件既人；講關係講背景，出身草根既我根本尤如垃圾。

眼看同我同屆參選既亞軍季軍，甚至係落選左既前途都比我好。佢地唔單止有重要既角色俾佢地發揮，而且傳媒都不斷報導佢地既新聞。我就知道，係呢個圈如果無背景唔識人，根本係撈唔到落去。

或者堅持到最後會有出頭天，但我無咁既耐性等運到，我Jessica係黎做天后，唔係做二三線既明星仔！為左上位，我接受左經理人既提議，答應出席名人富豪既飯局。