【慎入.無厘頭重口味痴線故】好對唔住，我哋醫院嘅報告已經證實咗你。。。。。: 郵輪

呢段經歷係發生喺德叔年輕嘅時候，都幾十年前喇。

「嗰陣我同芸妹已經識咗十年喇，我哋係喺中學識㗎，不過中間畢業嗰陣都試過失咗聯絡一排喇。到見返佢嘅時候，估唔到我原來已經鍾意咗佢。」

德叔講到呢度，成個樣都冧晒，好sweet咁樣。

但到下一秒，佢又變得好驚咁，似乎係諗起啲好可怕嘅事。

「我無辦法忘記佢當時嗰個咁恐怖嘅樣，實在係太可怕啦！」德叔已經講到喊，我隨手拎起咗一塊布，畀德叔抹抹佢啲眼淚。





「呢一條咪係芸妹嘅…算喇唔該晒你，估唔到芸妹嘅體香仲留芳喺呢一條……」

「得喇德叔你唔駛講㗎喇，我明㗎喇！」我嗰刻真係想嘔，我唔想再聽呀。

就係咁樣，德叔唔再喊喇。佢入返正題，亦都肯講返慢啲，因為佢頭先講得好跳呀。

「一開始我講到話再次遇到芸妹嘅時候，我已經深深畀佢吸引住。」

「其實你哋係喺邊度撞返㗎？」





「呢樣嘢重要咩？」

我覺得重要，因為可以幫我了解德叔呢個人。所以德叔終於同我講返佢哋係喺一個好浪漫嘅地方重遇而且邂逅。

「我都估唔到喺咁大艘郵輪上面，茫茫人海當中可以見到芸妹。」

無錯，德叔講嗰個好浪漫嘅地方，原來就係郵輪。

據德叔所講，當時同佢感情好好嘅德爸過身無耐，仲未走出喪父傷痛嘅佢，為咗散心而決定坐上呢艘當時號稱最龐大嘅郵輪：海洋壯禮號。





海洋壯禮號係一條長途航線，橫跨亞非兩大洲沿海航行，中途又會停站上落客，所以德叔都話記唔清楚艘船最後係行咗幾耐呀，只係話都有好幾個月咁囉。

「我係喺香港上船嘅，係郵輪埋岸嘅第二站。咁嗰陣芸妹已經喺船上面，我知道佢係喺韓國上船，因為呢艘郵輪係喺釜山啟航，點都好喇我同佢嘅故事就係由嗰度開始。」

德叔話就話喺郵輪上面重遇芸姨，不過郵輪係好大㗎嘛，佢地具體喺邊度撞到，一講到呢個問題，德叔唔知點解有啲難以啟齒喎。

「講啦講啦，唔好收收埋埋喇，你唔講都講咗咁多喇係咪先？」

「好瘀㗎喎，你真係想知，你聽完唔好笑阿叔呀！」

我本身真係應承咗聽完唔笑佢㗎，但聽完之後……對唔住我真係笑咗。

話說德叔當時仲飽受住喪親之苦，雖然佢係打算上船散下心，不過佢根本唔知道點做先係啱。

於是佢一上船就即刻去咗酒吧劈酒，當然咁做嘅話係一啲意義都無，勉強用酒精嚟暫時麻醉自己嘅痛苦，只會令件事更加麻煩。





之後德叔諗返件事都好清楚呢一點，只係當時年少嘅佢就唔識諗囉，幾杯到肚好似醉醉地喇，竟然誤認咗船上嘅一個男人係自己老豆，仲一啖咀咗落去！

「你痴線㗎？搵食行遠啲喇！」

「爸爸呀，我好掛住你呀……」

德叔嘅作為終於都令呢個男人忍無可忍，佢決定對德叔小懲大戒。

「嗱唔好話我打基佬呀！」

火爆男講完之後就隨手執起咗個空嘅酒樽，再一嘢打落德叔坐緊嗰張吧檯度！酒樽破碎產生出清脆而又響亮嘅爆樽聲，響到全個酒吧都可以聽到，全場嘅人即時靜左幾秒，然後繼續作樂。

「你敢再掂我，下次就唔會再咁好彩！」火爆男發泄完之後就走咗喇，不過德叔就好大件事囉！





待續...