要生存，就要殺死自己: 第十一話
【第十一話】
禁左一下門鐘之後，好耐都無人應門。
同琴日我搵許雯既情況一樣，令我視線不自覺地望向門上既防盜眼，諗起當時有個黑影哄埋黎個下心寒感覺，如今仲有少少淆底。
阿明禁多幾下門鐘之後，都係無人應門，而且鐵閘鎖左，我地都無得貼住大門聽下屋內入面既情況。
『可能落左街，我地係到等下。』說罷，阿明拍一拍自己個屁股，坐左係鐵閘門前。而我就挨住道牆，呆呆咁望住前面。
『啪啦啪啦啪啦』
雨聲不斷，係陰森既氣氛底下，我同阿明都唔知可以講咩好，只係突然間感到一陣累意，我係到諗如果無出現過近來種種既事，我依家一定係自己張床到舒舒服服咁訓，望住出面好似世界未日既天氣，而自己可以置身於事外個種暢快感覺真係非筆墨能形容。
我地一直沉默左十幾分鐘，阿明終於開口說:『其實諗深一層，真係幾荒謬。』
『你指咩?』
阿明係褲袋到拎包煙出黎，好順手咁拎左支煙放係嘴邊，點著後再狠狠咁吸左一淡，然後輕輕呼出。
『未來人喎，唔荒謬咩，家陣拍戲咩。』
我用手揚一揚，唔想啲煙霧飄過黎，因為我覺得啲煙真係好難聞，但我都係第一次見阿明食煙，以我認識既佢，唔似會食煙既人......不過，食煙有樣睇既咩?
阿明見我好似好抗拒，笑左一笑，然後說:『好難聞呀? 哈......我以前都好憎人食煙，又貴又難食，都唔明點解有人可以一日幾包幾包咁食。』
『咁你依家又食?』
『唔知丫，到依家為止我都係咁諗，都唔知食黎做咩。但當我Feel到有壓力既時侯，有支煙比我吸下，我感覺會好好多。』說罷，阿明又吸左幾口。
『你依家好大壓力咩?』
『嘿......少少啦，我係到諗五年後既我，會係一個點樣既人。而佢又點解要置我於死地，哈.....殺自己，我諗我依世人第一次比人憎到真係想我死。』
『放心喎，我一定唔比佢咁做。』
阿明點左幾下頭，轉頭笑笑同我講:『讀左大學三年，我無咩真心既兄弟，只有阿言同你，係我覺得值得花時間放感情去維繫既人。』
聽左阿明咁講之後，我就坐左係佢格離，拍一拍佢膊頭，真心地說:『多謝。』
『同你講樣白痴野，你聽過感情樹未?』
『感情樹? 咩黎?』
『你拎隻手出黎。』
『咩?』我遞左隻右手比阿明睇。
阿明攤開我手掌，然後指住我手掌上三條線說:『曾經有個人同我講過，感情樹係一棵專收集感情作養份既樹，當你同某一個人感情好好既時侯，感情樹既樹枝就會生長，感情愈好，樹枝就會生得愈長。』
『咁棵樹係邊?』
『唔知架，係個心入面怪。』
『車.....你講到好似真係有依棵樹咁，咁啲樹枝呢? 無棵樹又點見佢生得長?』
接著阿明將手上支煙慢慢係地下鑽，鑽到支煙熜左。然後再係我手掌上面畫左一畫，我見佢咁做，雖然覺得好污糟，但我見到阿明咁認真，反而一啲嬲既感覺都無。
阿明突然望住我笑說:『做咩? 唔覺得污糟咩?』
『覺架，不過你咁做總有你既理由。』
『嘿.....你棵感情樹會慢慢......慢慢.....吸收感情既養份，慢慢....慢慢....生長到你手掌上面既感情線。拿! 你睇下! 你條感情線係咪深色左，證明我同你既感情又向前左一步! 今日一小步，人類一大步丫! 哈哈!』
我無理到佢個爛gag，反而望一望手掌，見到條"感情線"比阿明支煙畫到灰色，線邊仲佈滿左零零碎碎一粒粒既野，其實真係幾污糟，但諗諗下，如果有啲意境幻想下既話，真係好似阿明所講，條樹枝真係生到我手掌上面，仲深色左。
『啪啪!』
阿明將我隻手拍左幾下，將啲煙灰整走。
『做咩拍走佢? 唔係話感情樹枝咩!』
『傻既咩你! 依啲低能野講完就算架啦，你貪污糟咩!』
『超!』
我地兩個再一次沉默起黎，阿明又繼續拎另一枝煙出黎食。而我比阿明攪一攪，我腦海一直諗緊阿明口中所講既感情樹，究竟係點既樣呢? 不禁問一問阿明:『依樣野你諗出黎架? 都好老土下喎。』
阿明呼左淡煙出黎後說:『唔係我諗，係一個......對我好重要既人同我講。』
見到佢個樣咁沉重，我諗依個人對佢真係幾重要。
『不過.....諗返起岩岩我地既對話，真係好Gay! 哈哈!』
『妖你收皮啦!』
『哈哈哈!』
突然遠處傳來一段升降機到達樓層既聲音，似乎有人出Lift門，慢慢行緊埋黎。我同阿明即刻收起講笑既心情，內心既緊張同不安感覺慢慢湧上黎，我地兩個視線向住走廊轉角位方向望去，明明我地黎搵許雯，但內心依一刻嚇到反而唔想見到許雯出現。
腳步聲愈黎愈大聲，我同阿明就愈緊張。
之後出現既係一個拎住幾袋餸既肥師奶，我同阿明都鬆左一口氣。由於之前都黎過許雯屋企唔少，依個肥師奶就係住係許雯對面屋企，我諗佢都認得我。
當肥師奶行到門前，一路開鐵閘一路同我地講:『地下咁污糟，做咩坐係到丫?』
『無呀，我地行到累想坐低抖下。』我開口說。
『搵阿雯呀? 佢地成家琴晚去左旅行喎!』
聽到後，我同阿明都彈左起身，驚訝地問:『旅行? 我琴日先見完佢黎喎!』
『我唔知丫，我琴晚炒菜個陣無油，又唔想咁麻煩咁街買，咪問下許太借囉! 點知佢地成家人執緊野，話去旅行，之後好急就走左。』
阿明即刻搭咀:『你覺得許雯有冇變到?』
『阿雯? 嘩! 真係女大十八變! 靚女左好多!』
『咁伯母佢地呢?』
『許生許太? 有冇變? 呀......又唔係好覺既，不過你咁問到，我又覺得好似少少唔同左咁。你地做咩咁問呀?』
我同阿明對望左幾秒後，大概我地都諗到同一樣野。
『咁你有冇見到佢地隻手腕有冇配帶?』
『邊鬼記得丫! 你想知既話!你咪等佢地去完旅行再問佢囉! 我要去煮飯啦!』說罷，肥師奶就拉上鐵閘關上門。
我地見許雯唔係到，我同阿明決定走。等緊升降機個陣，我大概估到件事係點。
『你點睇?』阿明問。
『正如我地當初假設許雯已經死左，無事返返黎果個就係未來既許雯，而許雯既爸爸媽媽......我諗已經比未來既自己殺左。』我將我既諗法講出黎。
阿明再即時接著說:『加上你琴日咁突然搵許雯，仲問埋啲奇怪問題，我諗對方意識到件事已經揚左出去，為避免不必要既麻煩，於是好急咁走左。』
『激氣! 仲諗住搵到佢可以知道成件事係點! 依家佢去左旅行!我地點搵到佢!』
升降機咁岩到達左17樓，開門後，有一家人出Lift，慢慢係我地身邊走過。
我入左Lift之後，見到阿明仍然企左係出面，於是問:『做咩唔入黎?』
『要搵未來人既話，唔一定要搵許雯。如果件事慢慢發展落去既話，隨時係我地身邊......又或者岩岩係我地側邊行過既人，都可能係未來人。』
聽到阿明依番說話後，一股寒意同不安既感覺再一次湧現，因為我意識件事開始慢慢咁發展起黎，隨時遠超我們想像之中。
【第十一話完】