在IG上重遇你: 41

第四十一章

終於到左星期三，因為太緊張的關係，琴晚我完全訓唔著，今朝七點已經起左身。

我攞晒衣櫃裡面啲衫，睇下今日著邊件戰衣出街，但係左揀右揀都冇件啱，結果都係著返件恤衫同牛仔褲。可能我太嘈嘅關係，呀妹都比我嘈醒左。

「馬國威，你有冇病呀？一朝早嘈喧巴閉，我唔洗訓啦！」

「對唔住，對唔住！我靜返少少」我唔敢再發出太大嘅聲音，費事又嘈醒隻魔鬼，我就死無全屍。





其實今日Bobo約左我食晚飯，成日流流長，點先可以hea到七點？我碌左陣ig，見到有間cafe幾吸引，就決定今日去間cafe！

雖然我平時唔係路痴，但一入左港島區嘅我，即刻變左個路痴。就算用埋google map，我都可以行錯幾轉路，終於誤打誤撞揾到間cafe

可能今日係閒日，店入面得一兩枱客，我揀左靠窗嘅位，叫左杯cappuccino，就開始睇書。本來諗住今日可以悠閒地渡過，點知比我撞到個日同Bobo行街嘅男仔。

佢入黎嘅時候，我望左望佢，不過個刻我淨係覺得熟口熟面，諗唔起係邊個。飲多幾啖咖啡，我突然間醒起佢咪我個「情敵」。就係呢條友搞到我情緒低落左幾日，今日比我遇到佢，仲唔係要我踢爆佢一腳踏兩船！

【小姐，呢個男人背著你，係出面搞三搞四！】
【係咪真㗎？你個賤男，講到自己有幾專一，原來又係為左呃蝦條？】




【我冇呀，我都唔識佢，佢亂講嘢㗎！仆街，邊個叫你黎？】
【我係睇唔過眼，要替天行道！】
【屌，遇到個痴線佬！XX，唔好走呀！】

「哈哈哈⋯⋯⋯⋯」我面都紅晒，因為成間cafe嘅人望住我係到傻笑。