在IG上重遇你: 36

第三十六章

今日手氣特別好，舖舖牌都靚到嚇死人，我一個人大殺三方，搞到佢地唔俾我玩，要我坐埋一邊自閉。

望人打牌係一種折磨，所以我睇左陣就走左出廳，見到Jessie坐左係到傾電話。我費事嘈到佢，於是靜靜雞行去廚房搵嘢食。

可能我太耐冇黎佢屋企，搵極都搵唔到啲杯麵，突然間後面有人出聲：「啲杯麵依家唔係放廚房啦！」

我擰轉頭一望，原來係Jessie，我笑住問：「你咁清楚，介唔介意攞個杯麵俾我呢？」





Jessie行左去個櫃，係裡面攞左兩個杯麵，跟住話：「等我幫你淥埋啦，費事你拆左個廚房！」

既然有人幫我整，我就坐定定等食。好快佢捧著兩個杯麵出黎，放左係枱面，然後話：「你咁快就出黎，唔通你已經輸晒？」

我笑左笑：「啱啱相反，我贏得太多，佢地唔俾我打。但點解你又冇入去打牌？」

Jessie：「我唔係好識打，今日係陪Crystal入黎，佢話Jenny叫左幾個男仔打牌，佢要睇下有冇靚仔，可以安撫下佢寂寞嘅心靈！」

我差啲笑左出黎，不過我都係忍住左：「咁我諗佢應該好失望，冇靚仔可以安撫佢」





Jessie：「仲以為你會話自己係靚仔添」

我：「我冇咁厚面皮，講得出呢啲嘢」

傾傾下，佢地走左出黎，話要中場休息。Crystal同阿輝行埋黎，阿輝喊住咁講：「阿威，你要幫我贏返晒啲錢。你一出去，佢地三家聯手，我輸到連底褲都要賣！」

我搭住佢膊頭，笑住咁話：「頭先唔知邊個話我贏得太多，唔俾我打，仲要趕我出去呢！」

輝：「威哥，你大人不記小人過，你就幫下細佬啦！」





我：「睇下你有冇利用價值先」

阿輝諗左諗就話：「我有個消息，對你應該幾重要，係關於Bobo嘅事。」

我即刻拉左阿輝出去，問：「你想講啲咩先？」

輝：「嗰日我經過一間餐廳，見到佢同個男仔係到食緊嘢。」

我：「你確定你冇睇錯，不過就算佢同其他人食飯，又代表唔到啲咩」

輝：「但我見佢地好親密咁，你再唔去追人，我驚你又錯失良緣」

雖然我表面好似冇咩所謂，不過阿輝咁講完，都搞到我有啲心亂。我不停問自己，我係咪應該去馬呢？我同Bobo依家嘅關係究竟去到邊呢？如果佢對我冇興趣，我地會唔會連朋友都冇得做？