在IG上重遇你: 27

第二十七章

因為應承左阿輝去幫佢地打比賽，所以今日我要去同佢地練下波，費事聽日打波冇默契，俾人話就唔好啦。

去到球場，見到班隊友入面，有一、兩個都係籃球隊嘅隊員，而其他幾個係阿輝以前嘅中同，但實力去到邊，我就唔清楚。不過，我信阿輝搵得返黎嘅一定唔會差。

Jason：「威仔，你黎左啦。今次有埋你加入，同阿輝雙劍合璧，我地仲唔攞硬冠軍！」

我：「我等你同阿輝carry我先真。同我介紹下啲對友啦！」





Jason：「依家射緊波嘅係大杰，訓左係地下嘅係佢細路細杰。跟住係左手邊有兩個高佬，分別係呀Ming同呀Dee」

我：「真係人才濟濟，睇黎你地真係想奪冠」

輝：「如果唔係，我都唔會叫你過黎。我同你講，大杰嘅防守能力，呀Ming嘅籃底護框同低位進攻，Jason嘅三分冷箭，你嘅進攻能力，加埋我嘅神指揮，另外只要替補發揮穏定，今次一定攞硬冠軍」

我同佢地操左四個幾鐘，真係同阿輝講嘅一樣，每一個人都好強，合作起上黎仲舒服過我同校隊班人練波。我越黎越期待聽日嘅比賽會發生啲咩事！

練到大約六點幾，阿輝話要請大家食餐飯，當係鼓勵下士氣。我地去左附近嘅酒樓食飯，食到一半嘅時候，阿輝突然問我嘢。





輝：「阿威，不如叫Bobo佢地聽日黎睇我地打波，等佢地知道我地有幾勁」

我：「我諗佢黎唔到睇比賽，琴日睇佢個IG Story，佢好似去左日本旅行」

輝：「既然係咁，唯有下次先叫佢黎。咁Queenie呢，佢應該得閒黎？」

我：「叫佢一個人過黎咪仲奇怪，都係等埋下次先叫啦」

輝：「究竟你同Queenie點姐，嗰日燒嘢食你地發生咩事？」





我：「冇…冇嘢發生。唔好講我住，你同Bobo有冇傾到計？」

輝：「我有同佢傾計，不過佢好似冇咩反應，係咪我唔夠吸引呢」

我心入面竟然有少少開心，但我唔可以表露出黎，於是話：「可能佢同你唔係好熟，所以先唔識俾反應你」

輝：「你講得啱，可能Bobo唔熟我姐，等我下次同佢傾多啲計先，俾佢認識我多啲！」

同佢地食完飯，我地就各自返屋企。我睇IG嘅時候，見到大家都去緊旅行，搞到我自己都想plan返個旅行。跟住我收到Bobo嘅whatsapp，佢send左張蟹宴嘅相俾我，仲加左句「你上次咪話好想食蟹宴，我依家影俾你望梅止渴🤤🤤🤤🤤」

我：「你自私去旅行😠😠，仲要影我最想食嘅蟹宴🤤🤤，你係咪嘲笑緊我！」
Bobo：「😈😈等你羨慕下，俾你感受下我嘅幸福😤😤」
我：「將開心建築係我嘅痛苦上，你好變態🤢🤢！我唔理，你唔買返手信俾我，就唔好返黎見我😡」
Bobo：「好啦！我每日都send啲手信俾你睇！」
我：「咁你千奇唔好俾我知你返左黎香港，我會報仇👊👊」




Bobo：「好啦，我要出去行街，唔同你傾，88」