在IG上重遇你: 16

第十六章

到左星期三，本來Bobo話同我食埋晏就一齊去，不過後來佢話學校有小小手尾要跟，會三點幾先去到，叫我自己去香港藝術中心先。我大約二點半就到左灣仔，不過我係傳説中嘅「路癡」，結果係灣仔迷左半個鐘路，我先搵到藝術中心。

Bobo話個畫展係五樓，我見到前臺有張海報，係五樓畫展嘅主題同埋展品嘅創作者名稱，其中一個竟然寫著Bobo嘅名。我上到五樓，見到都有好多人睇緊個畫展，我費事一陣搵唔到Bobo，就係最前個幾幅畫等。

點知未見到Bobo，我就見到我最憎嘅人，我前度Hazel同佢個有錢男友。

Hazel：「真係冤家路窄，咁都撞到你。你呢啲人都識藝術咩？」





我：「我都唔知你識藝術，你唔係淨係識名牌咩？」

Hazel：「呢個畫展係Hayden爸爸有份贊助，我地黎支持下。你睇下你，都唔知係咪上黎涼冷氣？」

雖然我忍住自己把火，不過我係心入面已經問候左佢全家十八次。呢個時候，我聽到有人係後面叫我。我望返後面，原來係Bobo，佢今日著到成個文青少女咁。

Bobo：「阿威，你特登係到等埋我呀！呢位係？」

我：「佢係我個ex，唔洗識佢」





Bobo：「又唔好咁講。你好，我叫Bobo，係阿威嘅女朋友」

我比Bobo講嘅嘢嚇一嚇，不過未反應得切，Bobo即刻拖著左我隻手就向前走。我望住Hazel個樣呆左咁，我竟然有啲快感，好似大仇而報。我比Bobo拖住行，去到其中一幅畫嘅時候，佢就停低左。我望下幅畫，幅畫嘅背景係一大班大男孩同一個小男孩打架，後面仲有個喊緊嘅女仔。我發覺個情景有啲似曾相識，但又記唔起係邊到發生。

Bobo：「你係咪覺得個場景好熟呢？」

我：「你又知嘅？」

Bobo：「不如我同你講個故事啦！係我三年級嘅時候，因為屋企問題，我要轉去新嘅學校讀書。個時我係好怕羞嘅人，係學校唔敢同人講嘢，結果因為我唔合羣，我成為左被欺凌嘅對象。個時我唔想返學，因為覺得返學好恐怖，所我成日扮病唔返學。直到有日，我被比一個小男孩救左。我永遠唔會忘記個日，我係學校花園比班高年級嘅人欺負，不過有個男仔突然間衝出黎，擋係我面前，個一刻就好似有個英雄要打壞人，雖然佢唔夠人打，不過多得佢我先冇失去希望。後來，我發現佢係我同班同學，而佢係我第一個同我講嘢嘅人，係我第一個朋友。」





我：「冇諗過你仲記得咁清楚，原來我係你第一個朋友」

Bobo：「如果唔係你，我都冇咁快融入到班同學裡面」

我：「不過今日你做左英雄，你救左一個大男孩，但係你都唔洗拖著我隻手咁耐」

Bobo塊面紅到好似蘋果咁，仲即刻鬆開手，搞到我好似有毒咁。不過呢刻嘅Bobo好靚，我竟然有啲心動嘅感覺，但我好快掃走呢個念頭，因為我知自己配唔起佢，同埋我好兄弟阿輝話……佢鐘意左Bobo，叫我幫佢追Bobo。