在IG上重遇你: 13

第十三章

我一路聽住Bobo講佢嘅故事，一路望住佢嘅眼淚係咁流。我即刻攞包紙巾比佢，雖然我唔想佢繼續講落去，不過我知道呢個係個機會比Bobo釋放壓力。

Bobo：「阿威，多謝你聽我講廢話。阻左你成個晏晝添」

我：「冇所謂啦。反正我當聽一個故仔，你又可以將啲唔開心嘅嘢講出黎。」

我地傾傾下，已經五點半，本來諗住返屋企食飯，點知阿媽whatsapp我話佢同老豆返左大陸玩，呢幾日我要自己做孤兒仔，我就問下Bobo食唔食晚飯。





我：「你一唔一齊食晚飯，我請你。」

Bobo：「好呀，反正你上次差我餐飯！」

突然間，我聽到好遠有人叫我個名，我擰轉頭一望，竟然係Queenie同佢幾個fd。

Queenie：「Steven，咁啱嘅。你同你…女朋友行緊街呀，唔會阻到你地？」

我：「唔係，佢係我小學同學，叫Bobo」





Queenie:「你好呀，我叫Queenie，係Steven嘅同學。」

Bobo淨係笑左笑就算，我費事比Queenie問三問四，就捉著Bobo隻手，再同Queenie講：「我同Bobo約左朋友，唔同你講住。」跟住我就九秒九離走左。

Bobo：「你好驚Queenie咩？做咩走得咁快？」

我：「我費事比佢問長問短，我唔想比佢誤會姐。」

Bobo：「咁你仲捉著我隻手唔放，想博懵呀！」





我先發現自己拖左好耐，我即刻鬆開手，不過講真佢隻手真係好細，好似小朋友嘅手。我同佢走左去食譚仔，但因為晚飯時間，人特別多，我地唯有坐得逼啲。我同Bobo坐到越黎越埋，搞到我地好尷尬，我同Bobo拿拿聲食完就走，最後我送完佢搭地鐵，我先行返屋企。

返到屋企，我收到Bobo嘅whatsapp

Bobo：「今日多謝你陪左我成日😁😁，我開心返好多啦！」
我：「唔洗客氣，不過你記住下次有事一定要講，唔好收埋係心到🤗🤗」
Bobo：「知啦😂，話説今日個女仔幾靚女禾，你追緊人咩？」
我：「佢係我地系嘅女神姐，我邊到有能力追佢？」
Bobo：「😂😂好彩你都有自知之明，唔向難度挑戰」
我：「😒😒我好差咩？」
Bobo：「一啲都『唔差』😅😅」
我：「😑😑」

雖然比Bobo咁樣話我，不過我自問冇能力溝女神，我又唔係靚仔男神，又唔係有錢人，更加唔係有背景嘅人。女神， 只可遠觀而不可褻玩。