在IG上重遇你: 09

第九章

係之後嘅一星期，Queenie都黎左我地個溫習小組，而我同佢越來越熟，開始傾多左計，啲話題唔再只係讀書同溫書。我發覺我同佢都有相同嘅嗜好，好似我地都好鐘意聽「五月天」啲歌，又鐘意睇「叮噹」。就連我自己都諗有冇咁橋，竟然連嗜好都差唔多，唔通個天要送我一個女朋友！

好快我地就考埋最後一科，阿輝同Jason佢地約左成班人去唱K，我都被逼去埋，講真我真心唔識唱歌，同埋唔習慣係成班人面前唱。去到K房，佢地有人一早黎左攞房，我地係最遲個批。我一望入去，見到Jenny、佢條仔、組員A同埋坐係最邊嘅Queenie。

Queenie：「Steven，坐過黎啦」

既然佢叫到，我唯有厚住面皮坐佢隔離，而我感覺到其他男性向我露出又羨慕又嫉妒嘅眼神。Queenie今日著白色連身短裙，成個仙子咁，我差啲把持唔住，好彩我意志堅定，先冇係女神面前出醜。
Jenny走埋黎我隔離，係我耳仔邊細細聲講。





Jenny：「成績好係唔同啲，咁快就溝到女神，叻仔」

我：「咪玩啦！我同佢係fd，唔係情侶」

Jenny：「佢做到出晒面，你唔係feel唔到佢冧你」

我：「但我真係feel唔到！」

Jenny：「你真係情商負分，扺你成世做單身狗」





比Jenny姐「恐嚇」完，我都係去下廁所避風頭。咁啱阿輝同Jason諗住出去攞嘢食，就等埋佢地先行。呢個時侯，手機突然間響，原來係Bobo打比我。

我：「做咩打比我？」

Bobo：「衰人，你地班男人都係衰人，信唔過㗎」

我聽到佢哭嘅聲音，我諗佢飲到好醉，於是問：「你做咩飲到咁醉，你係邊呀？你有冇朋友陪？」

跟住有把男人聲講：「請問你係咪佢朋友？佢飲到好醉，我諗你快啲黎接你朋友」





我：「我依家過黎，地址係？」

阿輝同Jason見我咁緊張，就走過黎問我咩事。我冇時間解釋咁多，淨係話朋友有事就算。

我記得阿輝好似有揸車黎，就問：「阿輝，你係咪有揸車，可唔可以車我去蘭桂坊？」

阿輝二話不説，話：「去停車場等我，我去攞車匙同埋個袋」

阿輝見我成程車都唔講嘢，就知今次好大鑊，所以佢踩行油，希望快啲送我去蘭桂坊。我知道Bobo一個女仔係老蘭飲醉，等於送隻綿羊入狼群，我真係唔希望Bobo比人「執屍」。

一去到，我就直衝去個間Bar，我入到去就見到有幾個金毛係到聊緊Bobo，有個已經想帶走佢，我即刻衝上前，推開左佢隻手。

我：「Bobo，你做咩飲到咁醉？醒下啦」





金毛A：「喂，你呀！做乜撚嘢推尻我？」

我怒啤佢一眼，然後隨手落起個樽，向住佢地講：「你地班契弟，搵食就行遠啲，咪搞我朋友，唔係我尻都打爆你！」

跟住阿輝都趕到黎，班金毛見到阿輝就即刻走都走唔切。冇計，啲人係驚啲又高又大隻嘅人，而阿輝就符合晒。我擰轉頭望下Bobo，佢已經不醒人事，我幫佢埋左張單，就扶佢上阿輝架車。