那年，我為左發達去左做全職義工。: 《 3 老人院之行 》

經過上次，我開始諗依個會唔會係一個發達大計，䠆䠆腳就有錢收又唔洗受氣， 

但做乞丐比人見到咁無面，做義工叫人捐錢比我洗又唔知得唔得呢？

再唔係巴結樓下公園班廢老，佢地出去扮慘扮可憐，我就同佢地合作抽返佢地佣，就算賺唔到多都可以幫補下。 

幾日後，我經過社區中心張貼左一張星期六老人院探放既義工招募通告， 

機會黎喇飛雲！我第一時間走入社區中心同個阿姐報名，可謂知己知彼，百戰百勝，要混入佢地首先要了解佢既既喜好。 





「唔該，星期六個義工活動仲有冇位呀？我想報名呀！」

「緊係有喇，麻煩填左份表先吖，我再同你講解下個活動詳情。」

「而家啲後生仔好少可好似你咁有心，星期六日都抽時間做義工，好多都會寧願去返Part Time賺下錢就算。」 

我心諗，如果唔係想識多啲廢老，我洗鬼同你地晒時間咩，有時間我訓多幾個鐘唔好？

「係呀，幫到人自己都開心，同埋我好鍾意老人家架！」聽到自己講依句野，我不禁打左個冷顫，真係仲虛偽過講粗口會打冷顫。  





星期六朝早，我九點鐘就到左老人院門口，當然不出所料在場既好多都係啲師奶黎幫手， 

老人院入面充滿一陣又一陣既老人味，好多人對老人味既定義都好唔同，而現場就係白花油味撈啲飯味再加啲止痛貼既味道，入左黎一陣仿佛自己都老左廿幾年。 

係老人院既氛圍下，我既腳步都開始變得慢左，為左融入依度既氣氛我對佢地扮到好親切，亦都擺低平時對佢地既怨念，開始陪佢地傾計，當然開場白離唔開當年我點點點，當年打日本仔又點點點。

到底係佢地果個年代既人先會咁，定係人老左就鍾意回想年輕時既一切？ 

或者到我地依一代老左既時候，我地都會變到好似佢地咁鍾意瘋狂回帶，同一個故事無限loop，講極都唔會厭，到時候班細路又會嫌我地依班老野煩，一直循環。 





其實同老人家傾計唔難，只要係佢地講緊野既時候係啲適當既位加句嗯、哦、係呀⋯ 我腦入面放空都唔會比人發現。 

此時，有個睇落都起碼八十歲既阿伯篤下篤下枝柺杖行左過黎，坐左係我同黃伯隔離。