越界的姐弟戀（甜）: 大學篇第二部 - 第八章 ：婉婷與Michael （二）

時間線退回至婉婷同Michael第一次約食飯：

雖然係4點嘅電影場次，但Michael 提早咁半個鐘，早點半就到戲院等婉婷。

可能係人生第一次約女仔睇戲食飯，所以Michael都顯得好緊張，同平時嘻嘻哈哈嘅模樣截然相反。

下午4鐘正，婉婷上身白色小背配上黃色針織衫，下身杏色短褲，散發著一股青春可愛氣息行入嚟戲院。

婉婷衣著示意圖：




而婉婷嘅一身少女打扮， Michael睇到失晒魂咁，呆呆滯滯成碌木棟係到。

婉婷左望右望終於見到Michael，行近後發現Michael定晒格咁，於是係Michael眼前揮一揮手：「喂，你做咩呀？」

Michael回過神嚟：「喔…無…婉婷你咁著好好睇呀，好正！」

婉婷：「係咩…都係好普通…」

Michael望手望手錶，套戲已開場：「哎呀，開場啦，我哋快啲入去」



Michael講完一捉起婉婷隻手，準備入場。但婉婷縮一縮手：「呢個…」

Michael都知自己太突然太無禮貌，尷尬咁講：「哈，緊張入場，一下子無注意到」

婉婷笑一笑：「唔緊要呀，我哋入去啦」

而係睇戲嘅過田，Michael一樣係無法專心睇戲，雙眼被婉婷雪白無瑕嘅雙腿深深吸引住，但此刻婉婷只係專心睇戲。

曾經好幾次，Michael都想去拖婉婷嘅手，不過始終提唔起膽，因為佢都驚太急進，會嚇親婉婷，到時變成第二個Michelle就gg。



睇完套戲出嚟後都差唔多6點。

Michael嘗試搵啲話題：「哈，幾好睇套戲，啲打鬥場面幾精彩」

婉婷只係簡單咁應咗句：「嗯」

婉婷：「你想食咩野呀？今晚係我請你，當多謝你上次幫我」

Michael：「邊好意思」

婉婷：「要架！」

Michael見婉婷咁堅持：「不如咁啦，今次你請我，下次再出嚟時我請好無？」



婉婷：「嗯，可以呀」

之後兩人是但搵咗間餐廳坐底食，食飯時：

Michael始終都忍唔到自己嘅好奇心：「係呢，你之前點解同阿明分手嘅？」

婉婷：「呢個…因為阿明鍾意嘅人其實唔係我…」

Michael：「嘩，估唔到阿明氣友咁三心二意？即係佢比帽你？」

婉婷：「唔係…成件事好複雜…好難講得清，總之我都會祝福佢架」

Michael睇得出婉婷仲鍾意阿明：「喔，咁你…你而家仲鍾意阿明？」

婉婷：「我都唔知，但應該都放低咗」



Michael心諗：「咁都好啲，代表我有希望」

Michael：「哈哈，雖然好老土，但都要講下，舊嘅唔去，新嘅點嚟」

婉婷：「嗯」

食完飯後：

Michael：「我送你返屋企啦，我都順路」

婉婷：「嗯，好呀」

一路上，兩人都無太多說話。



婉婷：「我到啦，多謝你送我返嚟」

Michael：「少事啦，咁你上到去WhatsApp同我講聲啦」

婉婷：「嗯，88 la」

Michael心諗：「第一次約會應該算係咁嘅？雖然有啲尷尬，但氣氛點都叫ok la」

Michael望住手機，等緊婉婷WhatsApp。過咗十分鐘後，婉婷仍未有WhatsApp佢，於是Michael：「返到屋企啦？」

婉婷：「係呀，唔記得咗同你講」

Michael：「唔緊要啦，咁你都早啲去沖涼早啲休息啦」

婉婷望住手中嘅手機發呆，心諗：「我真係可以完全放低阿明咩…」



而跟住落嚟，Michael就好似護花使者咁，間唔中就會約婉婷出街同送佢返學。