越界的姐弟戀（甜）: 第三部-第五章：回家

婉婷只係好細力咁捏咗我鼻哥一下，所以係一啲都唔痛，而呢一捏令我有種更甜蜜既感覺。我心裡想：「自己真係有啲太猴擒，好彩婉婷無嬲啫，唔係都唔知點收科。」

熱戀中既情侶，相處時間永遠唔會厭多，時時刻刻都好會黏著對方，而我當然都不例外。聽到婉婷話要上樓，我心裡一沉，一臉苦瓜臉表露晒出黎。

婉婷見到我咁既樣，輕笑一聲，婉婷踮起腳尖，錫咗我面珠墩一下，然後溫柔咁講：「唔好扁晒嘴咁樣嘛，過兩日我地會再約架嘛。」婉婷講完後，雙手捏一捏我雙邊面珠墩，然後再講：「笑返先～」

比婉婷咁氹法，我瞬間笑返，然後講：「咁好啦，你快啲上去，入到屋要第一時間whatsapp我呀」。拍拖初時，當然係會將女友當成寶，好驚佢會出啲咩意外。

婉婷應咗句「知啦」就轉身就準備行入大堂。臨入大堂前，婉婷再轉身比咗個飛吻比我，然後開門入大堂。睇見婉婷消失係我視線範圍內，心裡有股不捨既感覺。



婉婷走了，我都轉身走人。而婉婷屋企其實同我屋企相隔唔遠，只係一個地鐵站既距離，但因為今日行太多路，我個人其實都有啲攰，所以截咗架的士搭返屋企。

我剛上的士，手機就傳來whatsapp聲，我打開whatsapp，仲以為係家姐搵我，點知原來係婉婷：「返到屋企要即刻話畀我知呀💘」。望到條訊息同個心心，心裡頓時覺得好甜蜜、好有幸福感。我好驚呢一切都係假既，所以我摵一摵自己大脾一下，痛呀！係真架！

我返到屋企時，差唔多十一點。我一開大門，客廳既燈係關著，我心諗：「唔知家姐訓咗未呢？」我關上門後就直接返入房，然後第一時間打比婉婷報到。

我同婉婷傾咗一個小時左右就收咗線。我拎咗套睡衣出房準備去沖涼。經過家姐房時，我停咗落黎，心裡想：「應該都要同家姐講返聲，比佢知道我已經返黎先得」。我輕輕敲咗兩下家姐房門，但都無反應。我心諗：「都成12點，家姐應該都睡咗」。