我要睇電視

二零x四年 三月x日 星期三 風雨交加 寒風刺骨 間中降霜

又一個普通的工作日，我如常地完成一天繁重的工作。雖然老闆為我編排的工作是永遠沒有完的一天，但「歡樂」的時光過得特別快，要走的終歸要走，七時半左右還是拖著滿身疲勞的身驅踏上永遠「爆棚」既地下鐵。

呢個就係我，陳大文，今年三十有二，結婚三年，育有一子，揹住四百萬樓債，餘生只求簡簡單單，平平淡淡，唔求發達只求唔駛餓死咁係六十歲前供完層樓，咁就覺得自己完成目標，兩腳一伸亦都無憾。

今日唔知點解，照常理三月時份香港都應該回暖，今日都仲係風雨交加，聽同事講仲話香港四處都有地方測到降霜。我諗好多香港人成世都未見過雪，而家突然降霜，實爭住玩啦。

「拍拍，先生，你背脊有幾個位都有雪霜喎！」地下鐵內身後既一位中年婦人為我拍走身後我看不見的雪霜。拍拍聲相繼不絕，看來車廂內的人背脊都沾有雪霜，無一倖免。





奇怪喇，古有六月飛霜，今有三月披霜，是不祥預兆！

平日我講野已經盡量唔得罪人，比人蝦又唔還拖，出到街正眼都唔敢望人一眼，避得就避，咁樣我出事既機會應該無人比我細啦。轉眼間到左美孚站，即使經歷了辛勞工作的十二個小時，見到甜蜜的家﹑老婆同個仔，咩委屈都唔記得哂。

一入到屋，烏燈黑火，奇奇怪怪，點解呢？平時我老婆實會睇住ＴＢＢ神劇愛回家等我返黎，通常做完愛回家我就剛剛好返到屋企，嘿嘿，諗起劇情都覺得溫馨，香港人搞咁多示威集會，掟蕉舉牌，愛國愛黨大遊行做乜。係香港永遠都餓唔死人，有得食有得着，治安又幾好啦（唔計最近個位前總編劉進塗，個別例子），有咩必要搞到佔中又瞓街咁大陣象。

幾秒沉思完之後，雖然唔係咩大道理，但非常有親切感，九成既和理非非香港人應該都係咁諗。入房睇下我老婆同個仔係咪唔舒服所以咁早就已經上床休息先。

「嗚。。。嗚。。。」房間中傳出我個仔既喊聲，我即刻衝入去睇下發生咩事。細問一下原來阿仔今日睇唔到放學ＩＦＵ，淨係睇到藍貓同埋喜羊羊，仲要講唔知咩話，聽又聽唔明，睇又睇唔懂，唯有扭媽媽計匿埋入房喊。





安慰完個仔同哄佢瞓之後，我同老婆就靜雞雞走出房門。今晚個仔咁早瞓造就左個二人世界比我同我老婆，真係多謝哂兩個電視台！老婆一出到廳就開電視，問我：「老公，今日唔知點解個電視怪怪地，又睇唔到平時播開既節目，收到既都係平時睇唔到既普通話節目，你快啲搞下條天線好過啦。」心諗你個衰婆，今日難得二人世界仲掛住睇電視。嘿嘿，唔理啦快快手搞掂條天線，再搞掂你。

搞左十分鐘左右，電視終於收到訊號，先收到一片紅，繼而播出一段官方片段。「由於香港ＴＢＢ電視台及ＣＣＡＴＶ電視台播出傷害中國人民感情之片段，二台及其分台一律收歸國有，即時由中央台取而代之。」

我同我老婆成個人停頓左落黎，無電祝睇，點過下餘生。。。唔得！我要睇電視！