波瀾: 第八話(四)
阿實坐在中段的觀眾席，想像著台上面有一名表演者在說著棟篤笑，不出幾秒就自己笑了起來。
「最後都係未喺紅館開過就走，」Peter突然走近，在阿實的旁邊坐下。「同你嗰兩個師兄一樣，無Ｘ用。」
「你覺得呢個時候我應該用一個正常嘅方式答你啊，定係用棟篤笑嘅方式答你好呢？」阿實看了他一眼，笑道。
「你係一個棟篤笑表演者，到死嗰一刻你都係，你覺得呢。」
「以後呢項專長可能只可以留返紅白事嗰陣用嚕。」
「嘩白事你都用？你份人有咁樂觀嘅咩？」
「唔好咩？如果他朝有一日我死咗，假設我個靈魂係可以飄喺外面睇嘅話，我覺得有條友企喺度搞gag，然後可以引到其他人個個都喺度笑嘅……咁都幾好啊，有無人喊無乜所謂啦，反正有咩人係真正著緊你嘅你又唔會唔知嘅，無必要通過眼淚嚟辨別啊。」
「呢段加工一下我覺得可以擺入去你棟篤笑入邊，幾似你風格。」
「我風格？我風格係咩？」
「嗯……比較反社會反傳統咁囉。」
「恐怖主義？」
「嗱，就係呢種，you got it dude.」
兩人笑了數聲，然後又靜了下來。偌大的伊利沙伯體育館裡空空如得只有他倆坐著，偶爾會有幾名工作人員整理現場的收音、攝影等事務，但阿實和Peter都覺得彷彿只有他倆一樣。
「其實我咁做你會唔會嬲我，覺得我太任性？」
「任性同堅持從來都係一線之差，你今日唔做都總有一日會做，我由你出道嗰刻就一直勸你唔好咁啦，有啲嘢無得逼嘅。」Peter笑著嘆了一聲。「只係到頭嚟，你哋三個我覺得都好有潛力嘅人，就咁全部引退晒……我係覺得有啲可惜啫。」
「坦白問一句，你覺得而家嘅我，同當年嘅余一丈，仲爭幾多？」
「嗯……爭十個江漸紅、五個張見歡同一個林華實咁上下啦，」Peter縮起下巴像是在思考什麼一般點著頭。「不過係佢爭你，哈哈。」
「即係仲有一段距離啦。」阿實一臉不甘心地搔著頭，雖然嘴上是笑著。
「坦白講就……爭少少囉，但我覺得只係閱歷上嘅問題啫。佢出道嗰陣無你咁後生，經歷過嘅起起跌跌比你多，寫嘅嘢自然會比你多元化，比你更加有實感囉。因為挫折係可以令人成長，佢有今日都係因為佢付出過同面對過好多嘢－包括向主流妥協、向『上面』妥協。」
「係嘅，我相信佢決定咁做嗰陣都可能覺得好痛苦。」
「而家你親身試驗過，可能會明白點解佢會妥協，亦都明白點解我會係咁勸你啦？」
「明嘅，」阿實笑著點了點頭。「但俾我再揀一次，我都一樣會咁做。」
「所以我咪話有啲嘢無得逼囉。」
「我哋師兄弟三個……論棟篤笑你會點排？」
Peter猶豫著抬起了頭，過了幾十秒依然是一臉拿不定主意的表情，阿實有點不耐煩地笑了笑，但他似乎還是排不了名。
「總會有一個排到呱？紅哥排第一？」阿實笑道。
「唔係，我會將阿紅排第三。」
「吓？點解啊？」
「因為阿紅係一個無追求嘅人，佢只係一個將所有自己覺得觀眾會鍾意嘅笑話擺入去自己個表演度，佢從來無諗過自己想做咩類型嘅棟篤笑，亦無自己想追求嘅風格，佢只係一個純粹服務觀眾嘅表演者。」
「……然後呢？」
「坦白講我覺得你同阿歡係同一類人，只係你兩個風格唔同咁解，但本質上我覺得你兩個無乜分別。」Peter笑道。
「所以到最後我同歡哥都無得留低？咩道理？」
「娛樂圈……」Peter嘆了口氣，深邃的雙眼朝那舞臺看去。「本嚟就係唔講道理架啦。」
下面試驗麥克風的聲音傳來，阿實拿出電話確認著時間，看見還有兩個小時左右才開始，便站起來打算回後台再練一下。
「你之後諗住點？」
阿實轉身看了Peter一眼，視線有點閃閃縮縮地移到別處，然後像是拿不定主意般歪了歪頭。
「可能真係要放棄啦今次……做啲搵真銀嘅工囉。香港地，地產金融、保險健身、地盤三行……餓唔死人嘅。」阿實苦笑道。
「唔試下忍幾年？我諗佢意思唔會阻你做電視嘅，做住先，過多幾年話唔定你可以再做返架喎。」
「呢個特首可以封殺我，下個特首、下下個特首甚至係咩咩局長之類嘅人一樣可以封殺我。所以……」阿實低下頭去笑了一聲。「可能我真係一直都係喺度嘗試緊一樣無可能做到嘅嘢啦。」
「我又何嘗唔係。」Peter也笑了一聲，身體傾向雙肘抵著兩膝，雙眼緊緊地看著那個舞臺，若有所思地嘆了一聲。
在往夢想進發的這最後一站，這三千多位進場的觀眾也將會是他最後的傾聽者。或許結局早已注定，過程在娛樂圈從來都不重要，但阿實還是希望，曾來聽過自己棟篤笑的那些人，都曾經能帶走一些東西，哪怕是只有笑容或是兩句正面的評價也好。
「我羅彼得從來唔簽啲無目標嘅藝人，話畀我聽，你嘅目標係咩？」
五年前，阿實停住了準備簽名的右手，抬起頭有點不明所以地看著Peter。
「目標？嗯……喺紅館開個人show？」
「屌，呢啲算咩目標啊，你可能用幾年就實現到架啦，可唔可以畀個……長遠少少、多少少豪情壯志嘅夢想啊？」Peter皺起眉頭一臉不滿地抖了抖手中的煙頭。「人生就得一次嘅啫，畀個遠大少少嘅目標自己，你第時老咗再諗返啊，都希望自己呢一世人過得精彩啦下話？」
「嗯……」阿實點著頭應道。
「大聲講多次，你嘅目標係咩？」
「我想成為……」
「世界上最出色嘅棟篤笑表演者。」
阿實用衣服的袖口拭去劇本上的幾點淚水，抬起頭試圖將它們收回眼中，但當然這是徒勞無功。模糊的雙眼彷彿看到了過往的景象，還有像是破碎又扭曲了的夢想，就這麼散落在翻騰的波瀾之中。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿