在西貢，見到日本兵的鬼魂: 第五節

現在身處這島上的人數一共有十人，包括和我在內的八個同事，經紀張和船家。
 
從沙灘的位置看過去，島嶼其實都頗大，看過去大部份也是樹木和凌亂的雜草，整體來看沒有什麼特別。
 
我從我的背包內拿出我的手提電話，和估計一樣，電話因濕了水不能開啟。
 
「我地而家點？有冇人知呢度係邊度？」負責公司內部文件的阿釗說。
 
「呢度我估係西貢附近，我認得出呢個島。」船家說。
 




「船家，遊艇沉之前你有冇通知到人地黎救我地呀？而家我地咁樣坐落去都唔係辦法。」周老闆說。
 
「架船沈得太快啦，我根本通知唔到其他人，不過你放心啦，我今晚唔返屋企既話，我家人聽日就會出黎搵我架啦，最壞情況都係等一日。」船家說。
 
即是說，如無特別原因，我們要在這個島上逗留一晚。
 
稍為休息了片刻之後，感覺體力開始恢復過來，於是我便打算叫其他同事向島的中心方向行去，看看是否有其他人可以協助我們，或者那裡有其他通訊設備也說不定。
 
「咁樣坐落去都唔係辦法，不如我地行入去個樹林到睇下有冇通訊設備，又或者可能咁啱真係會有人度呢。」我說。
 




「好，我陪你，橫掂坐響度都冇野做。」志文起身並示意其他人跟著一起來。
 
「我唔入啦，一係我試下釣唔釣到魚，成日留留長，我地都要食野架啦。」船家看著樹林，眼神露了一點點不安的神色。
 
「咁啦，我地分兩隊人，阿釗同阿培，你地幫船家手捉魚啦，其他人跟我入去樹林睇下有冇人啦！」周老闆說。
 
「係！知道，老闆！」
 
 
其他人於是跟著周老闆的腳步，一步步的往樹林的方向行去。




 
樹林的的樹和雜草長得十分之濃密，進入森林之後可能被樹阻擋著陽光的關係，感覺十分之清涼。
 
我們步行了約十五分鐘之後，在一棵大樹下稍為停留了一會。
 
「睇情況，我地一路行落去都唔會有咩發現，全部都係樹同草，我估呢到係一個荒島。」志文說。
 
我看一看四周，如志文所說，這裡除了樹之外，真的什麼也沒有，或許我們不應再浪費時間去搜查下去，應該在沙灘位置等候救援。
 
「咁啦，我地再行多十分鐘，如果沿途都冇咩特別既話，我地就返去啦。」經紀張說。
 
其他人沒有太大的意見之後，我們便繼續往島的中心進發。
 
「喂，你地睇下，前面好似有個地洞呀！」站在前方的經紀張說。
 




我望向經紀張所指示的方向，不遠處的地上果然有一個地洞，而洞的入口被樹藤等覆蓋著。
 
那個地洞的入口不是太大，可是望下去那條通道有點彎彎曲曲，在我看來那個地洞更加似是一個防空洞。
 
「點呀，有冇人有興趣同我一齊落去探險？話唔定有寶藏，如果係就發啦！」經紀張一臉興奮的說。
 
「唔好預我，我人老啦，唔嚇得，你地啲後生仔去啦！我響上面幫你地睇水！」周老闆指著我，阿亮和志文。
 
「但你冇燈，落去咩都睇唔到，尋咩寶呀？」志文看著我，像示意我和應他的回答。
 
「唔駛驚呀，我有帶防水電筒，本來諗住落水照珊瑚，估唔到而家有用。」經紀張從背包來把電筒拿了出來。
 
「我去！」我說。
 
如果裡面真的有寶藏的話，我可以即刻脫貧，不用再為自己的學費擔憂，亦可為家人提供一個舒適的生活環境，再說，如果裡面沒有寶藏的話，我也沒有任何損失。




 
這是一個不會賠本的賭博，我不能放棄；原本一個人窮，真係咩都做得出。
 
「咁啦！我地而家將身上既衫除左落黎，綁成一條繩先，咁有咩事你地上面既人都可以拉返我地上黎。」經紀張說。
 
我們預備好繩之後，便分成兩隊人，在上面幫我們握著繩的有周老闆，阿信和大昌，而往山洞探險的有我，志文，阿亮和經紀張。
 
我們稍為整理一下思緒後，便走進那未知的地洞。