前度: may2.9

第二日我照常返工，到左10點幾，無啦啦有人打電話俾我（平時真係好少電話打黎，多數係whatsapp）我攞出電話望一望，來電顯示：May。

我急急腳走到後巷，然後接聽電話。

「摸C摸C？」我開口。
「Chris？今晚得唔得閒啊？」
「得閒啊～又想搵我食宵夜啊？」
「同我食嘢好委屈你啊？」May扮嬲咁講。
「唔係，你搵我食嘢，我開心都黎唔撤啦」我扮到好開心咁。
「咁12點見啦」May講完就收左線。



我轉過頭同同事講今晚唔同佢一齊小巴啦，有人約左我食飯，點知個同事唱曬全公司都知，搞到各個黎問我係邊個（因為細佬真係真係無乜人約過）

於是收工又再行去潮特搵阿May，May一見到我，就即刻講今日傾計既主題。

「Chris，我識左個男仔，但我唔知佢既唸法。」May望住我講。

（我X啊，幾年前幫你追男仔，依家又再幫你追男仔啊？）

「你點識㗎？個男仔。」我疑惑咁望住May。



「個男仔係Ex介紹㗎。」May好冷靜咁講。
「下⋯EX介紹個男仔俾你識，咁點解唔搵個位EX問下啊⋯」我好驚訝咁講。
「我都有講過，叫佢介紹都要做下售後服務，但佢唔理我。」May一口氣咁講。
我有D唔想講，May見到我面色唔妥，於是又講。
「幫下我啦～Chris，我得返你一個可以幫我分析啊⋯」May好誠懇咁望住我

（唉，當我怕左你）
於是我同May一邊食宵夜，一邊聽May講解個男仔情況，個男仔以前係學校打開籃球，而且好多女仔追。



「點啊點啊？知唔知點解佢成日已讀不回我啊？」May瞪大雙眼等我答覆。
「以我睇黎，一係佢平時既習慣，二係本身佢多人追，所以都唔會好在意你。」
「下⋯咁我點算啊⋯」May好失落咁講。
「你怕咩啊，依個男仔唔得，你仲有其他男仔追啦。」
「但我對依個男仔幾有feel啊⋯」May有D唔開心咁講。
「可能係我分析錯呢，你睇多一排先啦。」我微笑咁講。
「仲等⋯都已經聖誕節啦⋯」
「咁你聖誕節有無約佢出街啊？」
「有啊，我約左佢幾日出街啊。」
「你有無佢D相？我想睇睇。」我好好奇咩人咁吸引阿May。
「你唔會想追返我啊嘛，我唔受㗎。」May一邊講一邊笑。

May隊左部手機過黎，手機螢幕顯示個男仔幾高下，而且身材幾中等，不過⋯⋯唔靚仔⋯

「喂，唔靚仔既？」我淡淡咁講。


「我不嬲都唔睇樣既啦，我睇心底㗎嘛。」May好誠懇咁講。

食完嘢後，我又俾May捉左上小巴，我又要送May返屋企樓下，我又要再坐的士返觀塘既家。

「趕唔趕阿？不如陪多我一陣啊？」
「唔趕，陪多你一陣。」

May點著枝藍莓8，然後又慢慢品嚐，用佢小巧既嘴，輕輕咁咬啖手中既藍莓8，然後把滿肚煩惱，一口又一口咁吐出，我唔知食煙係唔係可以解決煩惱，但我知依一刻，只有煙，可以麻醉下阿May，麻醉佢不安既感覺。