前度: may1.5

我同May一直濕吻，直到May媽打電話黎叫返去食飯，我地先停止左。我同阿May攬左一陣然後就講byebye，突然阿May開口問我。

May：chris啊，我地依家算係咩關係啊？

我俾May突然既問題嚇左一跳，真係唔知點答好⋯

我：我⋯我都唔知⋯

May冷冷地講左句：咁無嘢啦⋯



唉，我都知我衰⋯

我返到屋企，我都思考咁依個問題，究竟我地係咩關係，如果係我女朋友就更好啦，但我又驚，因為阿May係我一個同班同學既前度，如果同May拍拖，我真係唔知點同個同學講⋯

阿May成晚無搵過我，而我都無搵阿May，我以為我地既友情都係依一日結束埋，點知第二日一早，我收到阿May既whatsapp。

May：6:30 今日放學送我翻去好唔好？

我：7:30 好啊 放學地鐵站等。



之後阿May無覆我，而我朝早、中午見到阿May既時候，佢雙眼都係帶有種想問我嘢但又唔問既感覺，終於到左放學。

因為阿May約左我，所以我又走去地鐵站，（我平時係行返屋企）我見到阿May啦，於是同佢一齊走入車廂。

係地鐵依十幾分鐘，我同阿May係一句嘢都無講，佢悶悶不樂咁望住地下，而我企係門既另一邊，我地好似左右門神咁，我望住佢，但係佢依然都係望住地下，我又好驚地鐵一剎車會令佢失平衡，於是我走上前擋住佢，佢見我突然行過黎，抬頭望左我一眼。

個眼神令我覺得佢好可憐，我正想講句嘢，但阿May又再一次得低頭，我見到咁，我都無講出黎啦⋯

我同阿May行去佢樓下既路上，阿May行行下突然之間停低。轉個頭問我：chris，你未答我，我地究竟係咩關係啊！



我：我唔知點答⋯

阿May：你唔知點答？你係唔係因為Alex？（May前男友，我同學）所以你就唔敢追我啊？

我：係⋯係啊⋯

阿May冷冷咁講左句：女朋友可以換 ，但朋友無左就真係無，朋友重要過女朋友⋯⋯

我聽完阿May咁講，我就更加唔識講嘢⋯

阿May：你返去先啦，我自己行返去得啦⋯

我望住阿May得低頭慢慢咁行，我無轉身，因為我怕阿May會突然回頭望我一眼。但事實既係，佢無望翻轉頭。

之後幾日，阿May都無再搵過我⋯


而我開始掛住阿May，我會唸阿May依家點樣，依一刻，我已經知道自己，唔係普通有好感咁簡單，我真係愛上左May。

我問左個同學bobby意見（依位同學最後成為左我既老死）

bobby：你拍拖關阿Alex X事咩，Alex同May已經係過去左既嘢，如果你對May有feel既，就追翻人地啦，阿May問得你依句，證明阿May係在意你啦。

俾Bobby鬧完一鑊，我都知道自己好X衰，女仔最在乎既係安全感，而我連最簡單既問題都答唔到，連最基本既安全感都俾唔到阿May。

我振作翻起身，鼓起勇氣，用whatsapp搵翻阿May。

我：20:10 聽日放學等埋我好唔好？

May：20:12 Chris，你約我啊？

我：20:13 係啊，係唔係唔得閒？唔得閒咁算啦⋯



May：20:15 唔係，咁我地聽日放學見啦。