<<坐上前往尖沙咀的天星小輪，迷失在維多利亞港>>: <<迷失六十一>>

我跟書遙上了船後，向著船尾的地方走去。
 
雖然船上乘客不算少，但船尾的坐位意外地不算多人。
 
坐下不久後，船慢慢地開出，涼風輕輕吹向我們，書遙的長髮在涼風中微微飄揚，很是好看。
 
我享受著久違的「約會」，真想這刻的時間能永遠停頓下來。
 
大概是沈寂的氣氛有點不太舒服，書遙開口了。
 




「係呢，你依家做兼職補習，咁咪有好多時間囉？平時有咩做呀？」
 
「都唔係多時間㗎，因為我依家開始寫書，你都知我以前好鍾意寫嘢㗎啦，不過之前返工返到無時間，反而辭咗職之後有返自己時間，又可以開始寫下嘢咁。」
 
「吓？真㗎？我以為你已經放棄咗寫嘢。」
 
談起過去，仿佛回到跟書遙還在上大學時，在夜裡無憂無慮分享夢想的時光，心裡不由得牽起了懷念的感覺。
 
「好犀利喎，估唔到你成功出書！雖然遲咗啲，不過都恭喜你。」
 




「哈哈，犀咩利呀，簽書會嗰陣都係小貓三四隻咋。不過比起盲目工作，會多返啲充實感囉。」
 
「簽書會？大作家喎，我有無機會攞到你嘅簽名先，哈哈。」
 
「梗係得啦，啱啱書展完咗，我仲剩返好多書喺屋企，過兩日我返去拎本畀你啦。」
 
提到書展的時候，我內心突然有種說不出的不安感，我到底是怎麼了。
 
「好呀，本書叫咩名呀？」
 




「吓，本書叫......<<和你分開後的206天>>。」
 
書遙的問題把從不安中帶回來，取而代之的是有一點尷尬，畢竟這書是因為書遙而衍生的。
 
「哦，係，係呀。」
 
書遙頓了一頓，好像察覺到甚麼似的。
 
「本書，係咪因為我而寫？」
 
「吓？呢層......」
 
我別過臉去，無數的回憶湧現心頭。
 
想當初跟書遙分手後，剛巧公司那邊也發生了不好的事，愛情工作兩失意的情況下，懷著滿腔的忿恨，以文字去作出宣洩，故出版的小說中，可謂是半真半假的東西交錯而成。




 
而當中的情感表露，更是百份百地根據自己的情緒而生的產物。
 
故這本書可以說是因書遙而寫，但過了這麼長的時間，對當時的事情也沈澱了，說來說去，自己的問題可謂佔了大部份，才會導致愛情和工作兩不順。
 
小說所發洩的負面情感是面向書遙，但一切卻是我自找的，所以要我告訴書遙這本小說是因她而寫，好像又有點過不了自己。
 
「你係咪仲覺得，當時我唔應該鬧你無夢想，更加唔應該離開你？」
 
書遙淡淡的聲線，幽幽的眼神，好像有點回到當時的情況，在怪責我一般。
 
「唔係，我當時係有唔開心，係有怪你點解我為你做咁多嘢，但係你都唔明白我。不過我依家已經......」
 
「我唔係問你依家，我問你嗰陣係咪有怪我，而你已經承認咗！」
 




書遙那略帶不滿的聲線，勾起了我過去那種傷痛的感覺。
 
「書遙你聽我講，我已經唔係咁諗，自從你離開咗香港，我一直都有認真去諗你講嘅嘢，我一直都有反省。亦因為你對我講嘅說話，我先會再次諗返自己嘅夢想，先會再次去寫嘢，唔係你嘅話，我唔會寫得出呢本小說。」
 
「我知道，過去咗嘅嘢已經無辦法改變，但我一直都想證明畀你睇，我係有進步。我仲想表達當日你同我講嘅嘢，我依家完全明白，夢想係重要嘅。而最重要嘅，係我一直想同你講一聲，對唔住。」
 
對，我之所以一直掂掛著書遙，除了認為當日的我有做得不好的地方之餘，最重要是我沒有把自己的感受傳達給書遙。
 
而且，雖然我一直想起書遙罵我的說話，但當時我對她的說話可謂更加殘忍，不但踐踏了她的夢想，更加將她的信任眨得一文不值。
 
所以一直以來，跟她復合甚麼的，我連想都沒有想過。因為，我沒有那個資格，曾經傷害過書遙的我，欠她的是一個道歉。
 
而只有在道歉後，我才能重新出發。
 
書遙聽完我的說話，靜靜地看著我，半晌沒有作聲後，用不帶一絲感情的聲音對我說。




 
「講完啦嘛？」
 
「吓？」
 
我曾經設想過書遙各式各樣的反應，但從沒有想到會是如此的平淡。
 
「你改變咗，咁又點？你道歉，咁又點？」
 
「我.....」
 
「無論你點諗，無論你做咗啲咩，發生咗嘅事都唔會改變。你知唔知當日我有幾咁傷心？我有幾咁絕望？」
 
書遙的眼眶慢慢滴出淚水，那是絕望的淚水。
 




「你知唔知你嘅說話令我幾傷心，我一個人去到外國，遇到好多好差嘅事。我喺外國孤伶伶一個人嘅時候，尤其係病嗰陣，再諗起你嘅說話，嗰種絕望嘅感覺，係幾難捱。」
 
「書遙......」
 
「點解你當日唔留住我？點解你之後唔搵我？點解你要消失喺我面前？」
 
「點解淨係得你可以好好咁生活？點解得你可以放低過去？點解？點解呀？」
 
書遙的一字一句，都令我後悔不已。
 
我造夢也想不到，原來書遙是這樣想的，我的行為，竟為她帶來如此的傷痛。
 
「對唔住，書遙，對唔住。」
 
我也忍不住哭了起來，伸出雙手欲抱著書遙，卻被書遙推開。
 
「對唔住有用咩？我受咗嘅傷可以好返咩？你睇！」
 
書遙把她的上衣微微掀起，雪白的腹部，露出了一道明顯的傷痕。
 
「書遙？」
 
「你話你對唔住我，有用咩？可以補償到啲咩？我受咗嘅傷係咪可以好返？你改變咗，進步咗，我呢？我頭先話有出版社肯同我合作，假㗎！係假㗎！我去到嗰邊影嘅相根本無人欣賞，我連生活都成問題！最後我將相機都賣埋，乜都無咁返嚟香港。」
 
「我返到嚟香港，屋企人係咁鬧我，唔畀我返屋企！我夢想無咗，親人無埋，事業、朋友、愛情，我咩都無啦！你想對我道歉？無用，你根本唔知咩係絕望！」
 
面對書遙的指責，我無法反駁半句。
 
「書遙，對唔住。」
 
「唔好同我講對唔住，無用，一切都返唔到轉頭。」
 
書遙的哭聲像刀子般一下一下刺進我的心裡，我認識的書遙不是這樣的，她應該是很正面，無時無刻充滿活力的人。
 
到底經歷了甚麼事情，才令她變成這樣，我又可以為她做些甚麼？
 
「書遙，我......我可以點做，我可以點幫你？」
 
「你真係想幫我？」