<<坐上前往尖沙咀的天星小輪，迷失在維多利亞港>>: <<迷失五十六>>
聽到阿華竟然說因為我而令情況變得不能掌控，我實在無法做出任何反應。
「你嘅出現令所有事都脫離咗正常嘅軌道，原本坐船嚟到呢度之後，領航員會將架船停泊喺碼頭，然後等四十八小時之後先走。而我就會利用呢四十八小時去完成調查我細佬同遺留落嚟嘅情報。但你嘅出現唔單止令到啲怪物襲擊船隻，而且領航員亦因為咁而死埋，所有嘢都同我原本計劃唔同，我只可以跟住你再應對依家嘅情況。」
「就算係咁，都唔關我事。我都唔知點解會上咗呢艘船，亦都唔知點解會引到啲怪物過嚟襲擊我哋。」我一臉無辜地說。
「可能你真係咩都唔知，但你嘅出現絕對唔係偶然。至少，喺呢段時間對你嘅觀察，的確只有你，可以帶我哋離開呢個地方。」
「吓？我咪話咗我咩都唔知囉，點帶你哋走呀。」
「呢層你唔需要擔心。」
阿華拿出了一大疊筆記，並指了指筆記上的標示。
「呢啲就係我哋調查員嘅成果，雖然未係全部，但已經足夠帶我哋離開呢度。而我哋能夠選擇嘅地方有兩個。第一：九龍公園，第二：海濱花園。呢兩個地方，就係深淵將啲怪物送去我哋世界嘅傳送點。」
「就算知道呢度係傳送點，我都唔會識用，更加唔會知道點帶你哋走。」
「放心，你唔需要做任何嘢，只要你仲未絕望，我哋就有得救。」
我愈聽愈不明白，甚麼叫我仍未絕望，面對這樣的世界，我實在難以想像成功逃離這裡的畫面，難道這樣還不算絕望嗎。
「阿森，你要記住，深淵需要嘅係絕望帶嚟嘅能量，與之相反，擁有希望就係對深淵最大嘅武器。或者你未必有呢個自覺，但至少比起我哋在場任何一個人，你應該仲有啲嘢係想做嘅。」
想做的事情？
事業？家庭？朋友？我的小說？
不，硬要說的話，大概是書遙，我一直放不下書遙離開我的事實，在她離開我後，我曾經一度傷心得死去活來。
要說她是我的希望，倒不如說她為我帶來了絕望。
其實我明白書遙離開我的原因，亦明白她當時的心情，若我變成了書遙，也許我會作出同樣的決定吧。
只是，和書遙分開的事情，令我一直心有不甘，我知道我跟書遙大概是不可能復合，但是，至少我想在作出改變過後，好好面對書遙，把我的心情跟書遙說清楚。
「阿森，你無嘢呀嘛？成個人呆咗咁。」
看到我一臉呆滯，阿輝忍不住開口。
「我無事，只係我始終理解唔到點解係我啫。如果我仲係抱有希望，點解要引我入嚟呢度。」
「呢點我都唔清楚，我哋依家只可以做好能夠做嘅事。我哋唔好再嘥時間，深淵嘅情況愈嚟愈唔穩定，我哋要決定接落嚟嘅地點。我認為雖然海濱花園比較近，但去九龍公園會有多啲地方可以做掩護，而我亦都唔需要再隱藏自己，我哋應該可以成功去到九龍公園。」
「如果要二揀一嘅話，我都贊成阿華嘅講法，去九龍公園。」阿康把目光望向我。
「如果係咁，我都......」
本來我想附和兩人，但阿輝不待我把話說完，便搶著說。
「咪住，你哋去九龍公園嘅話，咁阿欣點算？佢被阿強拉咗出去，我哋要去海濱花園追返佢先啱！」
「佢哋幾個出咗去咁耐，星光大道嗰邊無遮無掩，點都救唔返㗎啦，接受現實啦。」
阿華冷酷地把話說明，阿輝當然不能接受。
「咁又點呀，你哋係咪要見死不救？要走你哋自己走，我要去搵阿欣！」
「阿輝你冷靜啲先，你出到去都做唔到啲咩。」
阿康拉著阿輝阻止了他。
「我唔理，我唔可以掉低阿欣！放手！」
兩人纏鬥期間，我思考著到底如何是好。
「雖然我係覺得去九龍公園好啲，但最後決定嘅係你。比起過往嘅所謂經驗，我更相信你嘅直覺，而且，深淵嘅目標係你，結局到底係點，要由你去選擇。」
阿華對著猶豫不決的我說。
雖然阿華再三對我說，只有我才能帶著他們離開，但我真的決定不了，眼前三人的性命，很可能因我一句說話而造成不可挽回的後果。
現實地想，阿欣他們離開了洲際這麼長的時間，遭遇不幸的機會實在太高了，而如果他們遭遇不幸，我再選擇經星光大道去海濱花園的話，我們全滅的機會很高。
但假如，阿欣他們有萬分之一的可能存活下來並到達海濱花園，而我們卻朝相反的九龍公園前進，阿欣他們便不可能離開這裡，亦可以說是我間接殺死了他們。
「我覺得，我哋應該去海濱花園。」
阿輝高興地看著我，其餘兩人則沒有太大反應。
「我揀海濱花園，唔係淨係為咗阿欣佢哋。一嚟距離會比較近，二嚟我覺得呢條路線係一早已經設定好。」
「你嘅意思，係深淵已經預計我哋會行呢邊？」
「我覺得係，如果你所講嘅深淵真係有自己意志引咗我入嚟，我唔認為可以簡單咁擺脫到佢。甚至可能我哋嘅一舉一動，深淵都已經感覺得到。」
我頓了一頓，指了指阿華的筆記。
「不過，深淵絕對唔係萬能嘅，如果唔係，你哋都唔會調查到咁多嘢。既然深淵唔係萬能，正面突破總比再兜遠路好。而且，如果救唔到阿欣佢哋，深淵嘅力量進一步增強，對我哋都唔係咩好事。」
「你講嘅都有道理，只係，星光大道嘅危險程度仍然係不變，可能嘅話，行外面去海濱花園會安全啲。」
「唔得，阿欣佢哋係經星光大道走嘅，唔行星光大道我哋點搵佢。」
阿輝聽到阿華的提議，表示強烈反對。
「我已經講過，阿森條命係最優先，佢死咗我哋就無得救。」
阿華並不認為自己的決定有任何問題。
就在兩人爭吵期間，突然傳來一陣哭聲。
那聲音斷斷續續地傳來，但在深淵這鬼地方，應該不會有其他人存在才對。
我們四人有默契地沈靜下來，往聲音方向慢慢走過去。
然後發現，聲音的來源，是來自入口位置旁邊的一個儲物櫃，半掩的儲物櫃傳來微弱的哭喊聲。
猶豫片刻後，我們決定打開儲物櫃的門，赫然發現一個小嬰兒。
「呢個咪船上個BB，唔係阿欣照顧緊嘅咩？」
「應該係佢都覺得阿強有古怪，所以放低個BB。」
「如果我哋要帶住個BB，仲要行星光大道嘅話真係可能走唔到。」
「好似我一開始咁講，唔好行星光大道，改行外圍，咁樣會安全得多。」
「唔得，唔行星光大道嘅話陣間救唔到阿欣點算。」
阿華三人你一言我一語地爭論著，各自說的也有道理，但實在無法得出結論，於是便轉頭看著我。
我想了好一會，如果書遙在這裡，或者她會不放棄任何一個人。又或者阿欣變成了書遙，我也會堅持走星光大道，但是......
「阿華，如果你掂到啲發光體，你會唔會同其他人一樣咁老化而死。」
「發光體基本上連生物都稱唔上，所以攻擊對佢哋嚟講係無效，而老化嘅原因未明，雖然我有一半屬於怪物，但我仍然會老化，所以我覺得一樣會死。」
「即係如果遇到發光體，我哋肯定會全滅？」
「如果範圍大嘅都可能避，但星光大道太不利啦，好大機會全滅。」
充份了解到危險性後，應該不會再選擇走星光大道吧。
「我明白啦，你哋行外圍啦，我去星光大道搵阿欣。」
「阿輝，你諗清楚先啦......」
阿輝舉起了右手，阻止了阿康的說話。
「阿欣對我嚟講係必需要保護嘅人，我同佢已經失去咗太多嘢，如果依家仲要拋棄佢，我就算成功走甩，都唔可能生存落去。」
看到阿輝的決意，我們都沒有出聲，因為大家都明白，這已是不可能改變的事情。
然後，我們準備好後，便分別向海濱花園前行。