<<坐上前往尖沙咀的天星小輪，迷失在維多利亞港>>: <<迷失五十四>>

「阿欣，你走先啦，我唔得㗎啦。」
 
「明叔，頂住呀，阿輝一定會嚟救我哋㗎。」
 
阿欣扶著腳部受傷的明叔，一拐一拐地在星光大道上行走。
 
「阿欣，明叔，你哋去邊啫？過嚟啦，只係需要幾秒時間，你哋就可以重獲新生㗎啦。」
 
在兩人後方慢慢逼近的，正是重生後的鄧美玉。
 




兩人邊逃邊警戒著鄧美玉和發光體，深怕鄧美玉會突然發難撲向兩人。
 
兩人沿著星光大道不斷前行，只想盡快走到海濱花園。
 
但奇怪的是，這段應該不會超過五分鐘的路程，現在卻像無限延伸般，無法看到盡頭。
 
「奇怪，點解行極都未到海濱花園㗎。」
 
「阿欣，你繼續行啦。我諗我真係唔得啦。」
 




明叔狀甚痛苦地說，只見他的腳踝腫得不像話，大概是阿強推撞他時弄傷了。
 
「明叔，頂多陣啦，你得㗎。」阿欣看著明叔的樣子，深知道明叔已不能繼續前進，但她實在不忍留下明叔。
 
「阿欣你聽我講，我係醫生，我好清楚自己身體狀況，我上個月做身體檢查嗰陣，已經知道自己有絕症。本來就算無發生今次件事，我都過唔到今年㗎啦。我唔想拖累你，你仲後生，仲有個對你好好嘅男朋友，你要珍惜自己條命。行啦，我留喺度幫你拖住佢哋。」
 
「明叔，我......」
 
「行啦，唔好要我白白犧牲。」
 




阿欣見明叔主意已決，加上身體的狀況確實未能繼續前進，只好強忍著眼淚向明叔道別後，繼續前行。
 
「點解得返你嘅？個女仔呢？」
 
晚了一會來到附近的鄧美玉，卻只發現了明叔。
 
「佢走咗啦，其實佢只係一個細路女，你放過佢啦。」
 
「放過佢？我唔明你講咩喎。」鄧美玉一臉疑惑地看著明叔，仿佛她真的不解明叔想表達甚麼似的。
 
「佢咁細個，而且仲有個咁好嘅男朋友，無謂要逼死佢呀。」
 
鄧美玉聽到後，臉上卻露出了詭異的笑容。
 
「我諗你誤會咗啲嘢，我頭先已經講過，我嚟唔係要殺你哋，我嚟係要令你哋重生。而且，我諗你太唔了解個女仔，入得嚟呢度嘅人，已經注定唔會有美好嘅人生，就算繼續生存，都只會被絕望一直折磨。」




 
明叔一臉疑惑地看著鄧美玉。
 
「就好似你咁，你本來抱住崇高嘅心態去醫人，但點估到會喺你事業最得意嘅時候醫死人。」
 
「點解你會......」明叔瞪大雙眼，不可置信地看著鄧美玉。
 
「你一直都放唔低呢件事，仲搞到無辦法再行醫，但最好笑嘅係，你最相信嘅朋友，取代咗你嘅位置。」
 
「唔好再講啦！我已經放低咗呢件事，而且我嘅朋友比我做得更好，呢個已經係最好嘅結局。」明叔語帶激動地說，一點也不像已經放下。
 
「最好嘅結局？哈哈，你唔好自欺欺人啦，你根本就未放低。而且，你嗰個所謂嘅朋友，哈哈哈哈。」鄧美玉欲言又止，似乎知道些明叔不知道的隱情。
 
「你笑咩呀？我都話已經放低，係我嘅錯，先會催毀咗個女仔同佢屋企人嘅未來。」
 




「你嘅錯？哈，果然你真係咁樣諗，估唔到你被你最好嘅朋友呃咗咁多年，但都係懵然不知。」
 
明叔不明所以地看著鄧美玉。
 
「你做咗醫生咁多年，唔通唔覺得奇怪，明明只係一個小手術，點解會有咁嚴重嘅失誤，仲整死埋個病人。就係你個『好朋友』，偷偷地將啲藥嘅份量改變咗，先會出事。」
 
「無可能......無可能，如果係咁，無理由會查唔到有人偷偷地做咗手腳。」
 
「你唔記得當個病人出事嗰陣，係邊個第一時間去手術室幫你。」
 
「係......係......」
 
「就係你位好朋友，佢表面好似去幫你收拾殘局實際上係去清理返佢嘅罪證，之後順理成章咁取代你嘅位置。而你就好似白痴咁同佢訴苦，仲要多謝佢聽你講嘢，真係好好笑。」
 
鄧美玉的恥笑聲不絕於耳，明叔沒有任何反應，只因他實在接受不了，自己的人生竟然毀在他最信任的好朋友手上。




 
「你嘅人生無任何意義，與其係咁，不如好似我咁『重新做人』，絕對比你依家要開心得多。」
 
明叔呆呆看著鄧美玉，他已無法思考任何事情，在決定留下在這裡幫阿欣爭取時間逃跑後，他已有心理準備接受死，只是他從沒有想到自己一直像小丑般活著。
 
陷入絕望的明叔，沒有再說些甚麼，亦沒有任何反應。
 
現在的他，只能等待被發光體吞噬的命運。
 
就在發光體吞噬明叔的瞬間，鄧美玉好像想起了甚麼似的。
 
「你頭先話阿欣只係細路女，仲要有好好嘅男朋友，要我放過佢。但我諗你搞錯咗啲嘢，入得嚟呢度嘅，內心都只有絕望，就算我放佢走，佢根本唔會有獲得幸福嘅可能。要唔要我話畀你知阿欣嘅絕望係咩呀，其實就係......」
 
風化掉的明叔已無法聽到鄧美玉的說話，亦永遠不會知道阿欣內心的絕望為何事。
 




即使仍能聽到，被絕望籠罩的明叔，亦不會有任何感覺了。