<<坐上前往尖沙咀的天星小輪，迷失在維多利亞港>>: <<迷失四十九>>

「放開我呀，我要返去搵阿輝呀！放手呀！」阿欣被阿強抓著後，一直嘗試掙扎逃走，可惜卻無法擺脫他的束縛。
 
「返去？嗰個阿華擺明有古怪，我做好心救埋你咋。」阿強沒有理會阿欣的反抗，繼續強拖著她前行。
 
「我唔駛你做咩好心呀！我要返去搵阿輝，放手呀！」阿欣無計可施下，狠狠地向阿強的右手咬了下去，咬得阿強大聲喊痛。
 
「屌，我屌，好撚痛呀！你係咪痴咗線呀，八婆！」阿強被阿欣咬得心生怒火，右手鬆開的同時，左手便摑在阿欣的臉上。
 
身形嬌小的阿欣被這樣摑了一掌，雙腳不穩跌倒在地上。
 




大概是心裡惦記著阿輝，加上受到阿強的掌摑，委屈感頓時湧上心頭，眼淚不自覺流了出來。
 
「阿輝......我要搵阿輝......」
 
「你要搵我唔會阻你，不過要等我遠離呢度，確保安全之後，我自然會放你走，到時你要搵阿輝又好要去死又好我都唔會阻你！不過，依家你要跟我一齊走！」
 
阿強沒有因為阿欣哭了出來而心軟，反而抓得更緊，拉著阿欣繼續前進。
 
就在阿強強拖著阿欣前行了一會後，阿強背部突然受到猛擊，抓著阿欣的手亦因此而鬆脫。
 




「仆街，邊個？」
 
阿強回頭一看，看到明叔拿著一支木棒揮動著，而阿欣則躲在明叔身後。
 
「又係你個死老野！」
 
「阿強你係咪痴咗線，自己走就算，竟然想拖埋個細路女落水！」
 
「你痴我都未痴！嗰個阿華擺明有問題，你哋仲好似個白痴咁信佢，我唔走嘅話，肯定會被佢害死！」
 




「阿華有無問題我唔知，但你肯定有問題，明知出面咁危險仲要拖阿欣出嚟！你要走自己走，無人會阻你，但唔好拖啲小朋友落水！」
 
 
「哈，危險？我走咗出嚟咁耐，邊度有危險？楝嘢入面就真係危險啦，頭先啲怪物大家都有眼見，擺明就係阿華引過嚟殺死我哋！」
 
「你真係痴咗線，阿康頭先仲跟住阿華，邊有可能引啲怪物落嚟。算啦，你要走就自己走，阿欣，我哋返去。」
 
明叔邊說邊示意阿欣回去，他則繼續面向阿強，以防他追上來。
 
「唔得！你哋要走可以，不過要等我去到海濱花園，到時你哋要走去邊我唔會理。不過，依家你哋要跟我走！」
 
阿強邊說邊靠近明叔，明叔則揮動著手上的木棒，以作威嚇。
 
就在兩人互相警戒，各不相讓之際，明叔背後卻傳來阿欣的驚叫聲。
 




「呀！明叔，快......快啲走呀！」
 
明叔回頭一看，只見一群發光體在阿欣背後緩慢移動著，而在這其中，有一個人混在發光體裡，像是引導者一般，慢慢向他們靠近。
 
「你......原來你哋都係阿華嗰邊啲人！去死啦！」阿強目睹大量發光體靠近後，先是一呆，然後突然發難，從後推了明叔一下，轉身拔腿就跑。
 
明叔被發光體吸引著目光，完全沒有預計阿強會突然發難，身體狼狽地向前一傾，幸好阿欣扶了明叔一把，要不然，明叔便已投向發光體的懷抱裡。
 
「阿欣，點解會咁？」
 
「我都唔知，我啱啱諗住跑返去酒店，但路上面突然多咗呢啲發光體，我本來諗住匿埋等佢哋散開再返去，點知......」阿欣指著發光體中的引導者。
 
「點知突然有一個人喺我身邊出現，我擰轉頭一睇，發現......發現佢就係鄧美玉。」
 
「鄧美玉？你講咩呀，佢唔係死咗咩？點會......」明叔難以置信地朝著那引導者觀察，待他看清那引導者的臉容後，便再也發不出聲音來。




 
「明叔，走......走啦，我哋唔可以再留喺度。頭先鄧美玉發現我之後，佢想將我拉去啲發光體度，佢想殺咗我哋呀。走啦明叔。」
 
阿欣拉了明叔一把，二人便轉身逃去。
 
看著二人漸漸遠去，鄧美玉並沒有著急地追上去。
 
她仍是保持著緩慢的速度，向著二人逃走的方向前進。
 
這種悠閒的感覺，就好像在告訴阿欣和明叔，他們是絕對逃不掉似的。