<<坐上前往尖沙咀的天星小輪，迷失在維多利亞港>>: <<迷失四十四>>

「呢本簿係咩嚟？」

「你覺得，我哋咁多年嚟，都只係得一個人成功離開呢度，咁我哋係點樣將啲資訊留低同帶出去？」

「我記得，你哋每次都會有一個領航員，應該係佢負責帶返出去。」

「無錯，但你要知道，領航員只能夠停留喺船度，無辨法喺深淵進行任何活動，所以每一次調查員有新發現，就會用呢啲筆記簿記低，然後諗辨法帶去畀領航員。如果無辨法送去畀領航員嘅時候，佢哋就會將啲筆記簿收埋，等下一次嘅調查員進行回收。」

「呢本簿就係之前嘅人留低嘅？咁你快啲睇下有咩有用嘅資料啦！」





「我勸你唔好咁樂觀，唔係每次調查都可以拎到有用嘅資料，絕大部份時間都只係一啲遺言嚟。」

「你......係咪搵緊你細佬嘅筆記簿？」

阿華靜默了一秒，回頭看著我。

「我唔係傻嘅，雖然我想搵返我細佬，但深淵呢度絕對唔係咁簡單可以生存落嚟。再加上無水無嘢食，我其實好明白，佢生存嘅機率有幾多。」

「咁......你唔打開嚟睇？」





阿華拿著這本可能是他弟弟遺物的筆記簿，右手就是翻不下去。

猶豫了良久，阿華深呼吸了一下，才翻開手上那本筆記簿。

只見他看到了筆記簿的內容後，眼神開始變得銳利起來。

「細路，睇嚟我哋中獎啦，你睇。」

阿華把筆記簿展示給我看。





「2018年5月？兩個月前？」

「無錯，而且入面嘅唔係遺言，係情報。」

「情報？但......我只係見到一堆符號......」

「呢堆符號就係情報，我哋每個調查員都會先將留低嘅信息加密，不過呢度嘅信息量太多，加上呢度又暗，我諗要出去先可以知道佢寫咗啲咩。」

「咁我哋快啲同佢哋會合啦。」

「唔得，我哋上嚟係要確保有無任何危險，而且仲有咁多間房未調查，唔可以走。」

「但係......」

「如果你驚就落返去先，我唔係要睇小你，但呢個係最合理嘅做法，未受過訓練嘅你，逃走先係正確嘅選擇。」





阿華的說話不無道理，而且剛剛那怪物觸手確實令我有點兒被嚇到，但是......

「唔得，我要幫手！左邊嘅房交畀你，右邊嘅房交畀我，如果我真係無出嚟，至少你會知道嗰間房有危險。我相信多多少少都可以幫到你。」

「好，決定咗就快啲行動。啲觸手對人嘅心情變化最為敏感，盡量平服自己嘅心情啦。」

我和阿華接下來分開行動，途中亦多找到了兩本的筆記簿，只是內裡記載著簡單的遺言，並沒有甚麼作用。

很快地，我們便把兩旁的房間都調查好了，剩下的，就只有在走廊盡頭的房間。

「終於剩返一間啦，我哋快啲調查埋就走啦。」

我正想推門進去的時候，卻被阿華阻止了。





「做咩事？」

「你唔覺得太順利咩？」

「吓？都唔係呀，中間啲房都有啲觸手怪物，又有啲奇怪陷阱，咁都叫順利？」

「正常嚟講，我哋調查員嚟到嘅時候，一但發現咗呢啲簿，會第一時間回收，但呢個地方竟然有三本，簡直好似邀請我哋嚟調查一樣！」

「的嗒，的嗒，的嗒，的嗒，的嗒，的嗒」

就在阿華猶豫著應該進去時，那聲音再次響起。

而這次，我們肯定那聲音，就是來自盡頭的這房間。

應該進去？還是回頭？