<<坐上前往尖沙咀的天星小輪，迷失在維多利亞港>>: <<迷失二十八>>

「阿康，你做咗啲咩，點解佢會咁嘅？」在場的人中，好像只有我感到震訝似的。

「係鹽。」阿康張開右手，手上面還殘留著一點一點的白色結晶體。

「鹽？點解你摸完佢條頸之後，佢就變成咁㗎？」

「阿森，之前咁樣綁住你係我唔啱，對唔住。不過依家開始我哋會保護好你。」阿康拍了拍我的肩膊，我下意識地向後退了一退。

「你講咩呀？你係咁，明叔又係咁？有無人可以話我知發生咗咩事？」





其他人聽到我的提問後，互相看了一眼後，阿康便主動說。

「明叔，你去睇住架船幾時埋岸，其他人搵下船上面有無咩用。阿森方面，等我同佢講啦。」

「好啦，咁阿森交畀你啦。下層......可唔可以落去睇？」

「盡量唔好啦，陳德昌佢啱啱仲戰鬥緊，雖然架船開咗，佢應該無事，但我覺得唔好搏啦。」

明叔點了點頭，便和其他分散在船上尋找有用的物資。





「陳德昌又係邊個呀？點解你哋好似知道好多嘢咁？」

「阿森，係我解釋之前，我想問你一件事，你有無一啲令你好後悔嘅經歷？要係後悔到你會扮唔知，扮唔記得，但發夢嘅時候，會無啦啦諗起嘅事。」

「吓？你問嚟做咩？」

「你答咗我先啦，好緊要㗎！」

阿康用力搭著我的肩膊，從他的眼神和肢體動作，我能感受到他是認真的。





當然，後悔的事情當然是有的。

但可能是性格使然，又或是那些事情並不算得上很重要，所以我並沒有試過那種午夜夢迴時，仍會痛苦得令我生厭的經歷。

不過，若說比較接近那種感覺的，大概就是跟我女朋友分手並失去聯絡的事情吧。

猶記得那天，她跟我一起，乘坐了最後一次的天星小輪，在那船上，她對我表示出那種失望之情，即使現在想起，內心仍有一種苦澀。

而更重要的，是我們並沒有把話說清楚，我便再也找不到她了。

大概她已對我徹底失望了吧，所以才會連一通電話，一個訊息也不願意回覆我，歷時最長久的戀情，就這樣消散逝去了。

如果可能，讓我重來一次，我至少會把話好好說清楚。

我是有夢想，亦會去追夢的，但我更希望，你能留在我身邊陪伴著我，為此我願意付出我的一切。





只是，那已經是一個不可能實現的願望。

「阿森，阿森！」

「吓？」

「我問你，你有無啲好後悔嘅經歷呀，做咩發晒呆。」

「後悔嘅事當然有好多，但係，真係令我痛到無法忘記嘅事，無。」

我悄悄地把前女友這個部份隱暪起來，畢竟，就算我不說，也影響不了甚麼吧。

而且，我和阿康並不是那種能無私對話的關係吧。





「真係無？」

「無呀！我都話無囉！」

「咁嘅話就好啦，因為你係我哋最後嘅希望，你唔可以有任何絕望，迷失嘅情緒。」

「究竟你想講咩呀？」

「阿森，我知道咁講你會好難相信，不過，為咗簡化之後要講嘅嘢，我先將個結論話畀你知，地球，唔係，係人類有危險啦。」

這，這是甚麼話，是笑話嗎？還是新的捉弄人的方法？

但阿康的樣子再次告訴我，他沒有說謊。

那，現在到底是怎樣了。





人類有危機？要滅亡？我要去救世？

我的腦袋實在無法好好地去處理他這句話。

但阿康接下來跟我說明了一切，雖然聽起來可笑，但卻異常地有真實感，該不會，一切都是真的吧？