<<坐上前往尖沙咀的天星小輪，迷失在維多利亞港>>: <<迷失二十五>>

「我......我真係唔知你講緊咩？」我搖了搖頭，心理上實在接受不了他的說話。

「你唔相信我都無辨法，不過呢個係事實。」

「咁......咁點解無啦啦要毁滅地球？地球無咗，嗰啲怪物一樣會死。同埋嗰啲怪物係咩嚟？地底人？外星人？」

「呢層我都唔知，變咗做怪物之後，雖然可以得到呢個地方嘅資訊，但係重要嘅部份我都唔知道。」

「就算你講嘅嘢係真，你同我講又有咩用？」





「有用，雖然情況係好嚴峻，但係瑪雅人都唔係傻嘅，佢哋喺察覺到呢個地方有古怪之後，已經有所行動，將一啲可疑人物列入咗監視嘅名單。不過，由於無辨法分辨出嗰啲係咪真正嘅怪物，所以先一直無辨法將佢哋排除。而我，可以將分辨呢啲怪物嘅方法話你知！」

「方法係？」

「佢哋嘅後頸會有一個窿，呢個窿大約有一隻手指尾頭咁大，平時會被啲頭髮遮住，只要你撥開啲頭髮就會見到呢個窿。然後，只要將啲鹽水潑落去，就可以將佢哋無力化同埋將佢哋變成怪物嘅形態。」

「如果係真，我哋就有辨法阻止佢哋。」

「無錯！不過你要有心理準備，雖然佢哋無辨法繁殖下一代，但係佢哋嘅數量絕對唔少。而且，佢哋已經將絕望嘅種子放咗喺其他人身上，只要佢哋一旦迷失，就會被吸入嚟呢個世界。」





「不過......我就算知道晒又點，我哋都無辨法離開呢度......」

「離開呢度嘅方法好簡單，就係解決令自己迷失嘅根源！你哋只所以會被送入嚟呢度，就係因為你逃避自己嘅問題。只要你能夠面對、接受並改變自己，你就可以離開呢度。」

說到這裡，我不禁想起了自己那不好的過去，那個被我埋藏在心裡，無比軟弱的自已。

「講就容易，如果人真係咁易改變，我就唔會出現喺呢度。唔好意思，我諗我無辨法將你嘅說話帶返出去我原本嘅世界。」

「放心，我明白呢個方法有幾咁困難，畢竟，我都係同一類人，先至會嚟到呢個鬼地方。不過，你哋嘅情況有啲唔同，因為，有一個唔應該存在嘅人出現咗喺呢個世界！」





「你係指黃洛森？」我的腦海裡浮現出周博士對黃洛森的說話。

「無錯，佢唔屬於呢個世界，因為佢嘅心仍然存有希望。佢嘅存在，對呢個世界就好似一粒毒藥咁，會慢慢破壞呢度。而佢，將會係帶你哋離開呢度嘅鎖匙，只有佢有能力帶你哋離開呢度！」

「你講真？咁要點做？」

「我唔知，我嘅記憶入面唔存在離開呢個世界嘅方法，但係，我有記憶，曾經有人成功離開呢個世界！」

聽到這裡，在一片迷霧中，終於找到一絲曙光。縱使他說的有可能是謊話，但這已能成為我活下去的誘因！

「接落嚟，你要記住，無論發生咩事，一定要保護好黃洛森！呢個世界會開始對佢進行排除，只要佢死咗，就無人可以將頭先嘅訊息帶返出去！」

「我明白啦，我會保護好佢！」

「我依家會幫你將架船駛去碼頭，上岸之後除咗要避開啲發光體同啲怪物之外，唔好向商場走，嗰度係陷阱嚟。之後嘅嘢，就靠你哋諗辨法。」





「吓？你唔同我哋一齊走？」

「無可能啦，我嘅身體已經變到同怪物一樣。而且，我依家將我知嘅嘢講畀你哋聽，佢已經發現咗，再同你哋一齊，只會帶畀你哋麻煩。放心，我唔會咁易死，咁難得拎返記憶，我要盡情破壞呢度！」

陳德昌話音剛落，突然一聲巨響，只見一隻怪物跳上了船。

它的觸手在四處舞動著，仔細地看，它正在收窄我們可以移動的範圍。

「估唔到嚟得咁快，小心！」

那觸手怪物突然把觸手刺向我，幸好陳德昌眼明手快，一下子把我推開，但他的右手亦因此而掛彩。

只見被觸手刺傷的右手，竟快速地腐爛並掉在地上。





看到這一幕，我不禁慶幸剛剛受傷的不是我。

「你無事呀嘛？」要不是早已看過陳德昌的真身，這刻我怕只能躲在角落裡瑟縮發抖。

「我無事！你快啲返上去，我會搞掂佢，之後送你哋上岸。我唔會咁輕易就死！」陳德昌那斷掉了的右手，以肉眼可見的速度恢復原狀，要不是看到這一幕，此刻的他其實跟普通人無異。

「但係......」

「唔好但係啦，快啲走，你喺度只會阻住我。」

「咁......好啦。」的確，我在這裡根本幫不了忙，我可是親身見證過這些怪物那超乎常人的力量。

「上到去之後，除咗黃浩森，其他人都應該已經知道晒我同你講嘅嘢，你哋要齊心協力，將我講嘅訊息帶出去。馬雅人嘅後裔會知道點做，我等你哋再次入嚟破壞呢個鬼地方。」

「我明白啦，你小心。」





「最後提醒你一件事，小心程書美。」

陳德昌最後這句說話令我甚是不安，但當下已沒有時間再去細問。

我懷著不安的心情，把堵塞在門前的雜物一一移開，再次回到小輪的上層。