上左個肥婆身, 好難移動呀: 最終章: 真島與牧村實

「大叔，多謝你借個魄比我」
我翻醫院揾翻大叔，向佢比左呢一星期時間表示感激 。
佢見到我一臉傷感咁講:「唉...你真係唔好彩.......冇左一魄算係靈界最可怕既事....邊有人想永生永世做隻蓄生....」
大叔沉默左一陣，嘆左口氣，「以前，都有個病人同你一樣。不過佢重慘，冇左一魂一魄。」
「咁佢之後點？永遠做蓄生？」
「咁又唔係，佢都算係靈界奇蹟啦。果陣佢唔甘心自己永遠做蓄生，咪借左個動物軀體落人間，揾翻佢啲魂魄囉。
佢死完又再轉軀體，每一世都冇放棄過揾翻佢既魂魄。
結果，佢轉左三，四次世，揾左一百二十年，終於比佢揾翻佢果一魂一魄。而家咪開開心心做緊人囉。」
「一百....二十年？」
「一百二十年算快啦，有啲人揾左五百幾年都揾唔到。」




咁姐係.....我有可能永生永世都揾唔到。
但我真係....好想試下....成為果個奇蹟。
我行去轉世處，大叔同轉世處既人講左我既情況，允許我保留記憶落人間揾我果一魄。
「記得，你失去既魄係發住藍光既「非毒」，簡稱愛魄，少左呢一魄，你會忘記左愛既感覺。」
講完之後，大叔正式收走翻借比我既一魄，藍色光隨即係大叔手上消失。
我即刻，覺得成個人好輕鬆....我摸摸翻面，奇怪，點解頭先我會流眼淚既？
轉世處既人將我帶到白色轉世房，準備幫我轉世。


不知不覺....我已經係度做左17年流浪貓。




不過都幾開心既，日日食飽就訓，得閒就去嗲下人又會有野食，舒服過做人添....
真係奇怪？點解我之前會咁想做人既？？
今日我又路到海邊散步，有個好得意既細路女走過黎摸我。
「喵！」我不滿咁對佢發岀叫聲。
「喂！心如！」
邊個叫我？
我望向前面....咦......佢咪係johnny？
佢拖住一個幾有大家閨秀氣質既女人行過黎，再一下抱起前面既細路女。
「心如！唔好再亂咁跑啦！」johnny 好勞氣咁教訓佢，再笑住咁拖住個女人同細路女行走。
奇怪，點解.......之前好似為左佢好傷心咁....




佢而家咁幾好呀。
「喵！」
咦，我見到........
我見到......
佢地一家大細前面.....有粒藍色既光點！
唔會掛！
唔會掛！莫非係我既魄？
我跑埋去johnny既腳前，一手捉住粒光點。
所有感覺翻翻哂黎。
我前面係.......johnny?
佢蹲低摸住我，温柔咁講:「貓仔乖。」
「老婆，聽日我地再帶心如黎睇貓仔好冇？」
旁邊既女人笑住點頭。佢地一家大細好温馨咁離開左 。
我回想翻johnny以前同我講過:
「因為真島冇同牧村實一齊，所以牧村實先會係佢一生最愛。」




「喵。」
我流淚望向佢地既背影，佢幸福既笑容就係我最想得到既結局。
再見啦，我既真島。

(完）