[愛情][少甜]我地係炮友定係情侶【每日00:00更新】: 2b

《女方視覺》
我期待半年嘅簽書終於都嚟到喇，但係今日因為學校嘅事，我竟然趕唔切去。去到會場佢哋已經走曬啦，去到只係見到一個同我差唔多大嘅男仔坐喺凳上面。

佢將佢嗰本書送咗俾我，真係好多謝佢，我應該要揾日約佢出嚟，回返禮俾佢。

上咗52x搭車返屋企，我一坐低就揭開本書。望住嗰兩個用鋼筆簽嘅潦草簽名，彷彿可以感受得到兩位作家用手壓著紙張嘅體温，鋼筆喺紙上遊走後所留下未乾嘅墨水。

我閉上雙眼，用手撫摸兩個筆跡，凹凸不平嘅簽名，寫住無數嘅努力同拼博。

原來簽名下方一個一連串嘅數字同一個名，呢D字都係由鉛筆淺淺寫下。



「9524……簡智…簡智咩呢?」D字過於潦草令到我睇唔到最後一個字。

睇到呢度，我忍唔住笑咗出嚟，簡智障XD

我用手機輸入佢嘅電話，set聯絡人做簡智障，然後就開始猶豫應唔應該whatsapp佢。

佢係個陌生人，但係佢送咗本書俾我喎~
睇佢個樣應該都唔會係D咩危險人物，不過我唔識佢…
但係人哋俾咗簽名書我，我係應該要送返D野俾佢呢？


我應該送返本一模一樣但無簽名嘅書俾佢？定點呢？

幾經猶豫，我終於打開whatsapp 嘅介面，無視幾段假惺惺嘅訊息，按下搜尋嘅放大鏡按鈕，揾到佢

一個以日落做頭像嘅人。

《hi，簡先生》
《我叫希雯呀～多謝你俾本書我呀！不勝感激{合笑emoji}》
《我揾日會俾返本書你㗎啦~{合手emoji}》
【呃…你唔使俾返我㗎啦你keep住呀希雯】


《但係…》
【如果你想回禮就俾你嗰本書我啦！我嗰本你keep住就得㗎啦】
【同埋呢～我叫簡智朗呀，唔好叫我先生啦！好奇怪{笑喊emogi}】

好難得可以揾到一個會願意主動同我傾計嘅人，一個唔會厭棄我嘅人，如果所有人都好似佢咁咪好囉。

一時感觸，失控嘅淚水填滿眼眶，喺飛馳嘅街燈光照耀下反光，如珠寶一樣美麗，卻被一個缺陷多多嘅主人戴上，那麼違和。

我拭去點點淚水，低下頭繼續回覆佢嘅訊息，出現咗一絲由衷珍貴嘅笑容，連其主人都無發現到。