日本食人魔《十六歲透明感少女黑夜狩獵事件》: 第五十四節

54.







市川政跟金魚在保安室裡面對座，金魚手腳全被膠帶綑綁著，臉上貼著銀色膠紙。眼光垂下，不敢跟市川對上。

市川手中握著槍，一雙豆眼盡往她身上打轉，似在心裡想著一個點子。然後又陰沉的笑著，再次哼起這首歌。
歌唱到這裡，就忽然陰陽怪氣的笑起來說︰「你頭先見到我，唔記得尖叫……嘿嘿嘿……」





金魚聽見怕得眼淚直流，撑著手腳想要掙扎逃脫，只可惜那膠帶把她扎得緊實。

市川眼珠轉了一圈，突然想起甚麼似的問︰「你有冇釣過魚？」

還未等金魚回應，就開始接續說起來︰「冇？咁又難怪……住係城市嘅人，難得會見到河……」

說完以後落入一陣靜默，似在想著遙遠的事情，然後又說︰「我以前細個嘅時候，住係鄉下……我家鄉係日本嘅埼玉縣，屋後面有一個小山頭……」

「我同哥哥兩個人成日都會上山玩……我記得沿住小路上山，一路嘅風景好靚，太陽落山嘅時候會將周圍都完全染成金色……連草頭上面都閃住光……」





「我就拉住哥哥嘅手大叫︰『你睇下！係鑽石！』」

「我哥哥大我三歲，我地以前嘅感情好好……」

「不過到大個咗之後，又係另一回事……」

市川說到這裡的時候，靜靜的搓著自己雙手看，又輕輕嘆了一口氣，接續說︰

「嗰時我隻腳唔好，要用扶助支架嚟行路……係膝頭兩邊有活動機關嘅個種助行器。個陣時覺得好有型，覺得自己好似機械人一樣……」

「因為戴住支架所以行得好慢，永遠都落後係佢後面……我好羨慕佢有健康嘅身體，可以好似佢咁靈活……」








「沿住山路一直上去，過咗一條小橋之後，就會去到一個山澗。沿途就已經可以聽見水聲，路邊石頭嘅隙縫之間會有水流過……嗰到啲河水好冰涼，係夏天嘅時候將腳放入去會舒服到令人大叫。」

「山澗嘅正中心有一舊巨型嘅大石，足足有我成間屋咁大……大石有一半浸係水裡面，我同哥哥就捲起褲腳向住大石行過去……我記得河水清到好似透明咁，最好玩嘅係，河裡面有一啲好細嘅魚仔，仲細過手指尾，會一路圍住係你腳邊……」

「嗰啲魚好似唔怕人，於是我地就係草叢執咗一啲鐵罐，想就咁去捉魚……」

「只可惜一路都唔成功……哥哥比較聰明，佢話︰要搵啲『誘餌』先得……」

「於是我地就係泥裡面掘咗一啲蚯蚓，用魚絲綁好再放入水裡面……點知個啲細魚反而游開晒……我覺得有啲失望，然後哥哥就同我講︰『釣魚要有啲耐性先得……』」

「我一直企係水裡面，望住啲魚餌，望咗好耐，望到隻眼都因為水嘅反光而刺痛。正當我覺得無聊想要行開嘅時候，哥哥就細細聲同我講︰『你睇！你睇！』」

「我擰返轉頭，見到水裡面有一個拳頭咁大嘅頭，顏色灰灰黑黑，好似石頭咁樣……係一條好大好大嘅魚，足足有我手臂咁大。唔知佢係邊到游出嚟，可能就一直住係石隙裡面，畀魚餌嘅香味引咗出嚟……」






「我興奮得大叫，魚就一下游開，游返入石隙裡面再冇出過嚟。於是我就同哥哥掘更多嘅蚯蚓做誘餌，但係嗰條大魚再冇出現過……」

「而家諗返轉頭，應該係我當時太過興奮嚇走咗條魚，又或者係電視裡面咪見到教釣魚嘅人會將蚯蚓切開一段段，等佢地啲汁液流出嚟，咁先可以吸引到大魚……你話啱唔啱？」


市川說到這裡就停口，注視著金魚在等候她的回應。只見金魚拼命一味搖頭，似乎從沒把他的說話聽進耳中。

「點解你地總係唔肯專心聽人講嘢……」市川一時落魄的低頭小聲說。

然後又忽然提起精神似的從椅子上站起身︰「我話一定係咁樣，點解我當時諗唔到呢個辦法呢？」

「對唔住！有時我會突然講得太多嘢……我哩個人有啲毛病，就係有時候講嘢太多……」市川說完以後，只是定眼看著金魚不發一言。金魚被他盯得心底發毛，就怕他心裡不知又在想甚麼主意。

「時間都唔早喇，我諗而家啲警察應該周圍搵緊我……哩到唔安全……」





「我知道有一個地方可以見到河，我帶你過去……你先係到等我一陣，我出一出去，好快返……」

市川說著，就把手槍塞回褲袋，轉身離開了保安室，順手把門關上。



金魚一瞬間完全呆了，究竟眼前在發生甚麼事？這人又是誰？想要怎麼樣？這人又跟張恩東有甚麼關係？

現在也不是想這些事情的時侯，現在不走更待何時。急急從椅子上站起身，卻一時間忘了手腳被綁，一下失了平衡就重重跌在地上。

當下也顧不了痛，像蚯蚓般捲在地上向前，想要爬到辦公桌那邊打999求救。

千辛萬苦的爬起身，笨拙的把電話接通了，開口卻發現自己說不了話，臉上貼著的膠紙怎麼也撕不掉。





電話聽筒裡傳來接線生冷淡的聲音，金魚愈急愈見鬼，想要伸手去抓筆筒裡的剪刀好把手腕上的膠帶剪開，卻一下把筆筒打翻了，掉在地上一直向著牆角那邊滾過去。

聽筒裡傳來接線生的叫喊聲，金魚「唔唔」的叫著想要求救，卻在這時候好像聽見外頭有腳步聲響起。

那人回來了？金魚此刻急得快要哭出來，飛撲過去抓起剪刀想要把膠帶剪斷，手卻完全用不了力。

只見那人轉眼間就要重新出現，金魚撕破喉嚨的叫著，只祈求接線生能夠聽見自己的呼喊。

然後保安室的大門重新被打開，金魚急忙把剪刀收在懷裡。

只見門前出現了一個陌生男人，身上穿著一套筆挺西裝。

西裝男見了金魚捲在地上的模樣，口中一下低呼，同時車匙就從掌中滑落。

此時市川正在男人身後，槍口抵在他背上，彬彬有禮的跟他說︰「麻煩你帶我朋友上車。」