【80後回憶】世紀末少女: 【五】陳奕迅 謝霆鋒

「係啦...你鐘意陳奕迅多d定謝霆鋒啊？」用兩張綿被蓋著頭的陳穎璇，隔著電話，以輕聲問到。 

1999年，在廣東流行音樂史上，是屬於後四大天王年代 (我話既！)。 

記得幼稚園天才表演時，十個男童有九個(被逼著)扮演郭富城，一身經典白色喇叭褲，配上 Bling Bling 貼身Deep V衫，個個「對你 愛 愛 愛 不Round~」。孩童時代最具代表性的「型仔」指標，就是郭富城，亦因此范振堯的「真‧靚仔」表哥一直被跨讚「好似郭富城」直至成年。 

除了「對你 愛 愛 愛 不Round~」的郭富城以外，男孩們最喜歡模仿的，相信就是張學友。小時候就是喜歡瞇著眼，壓底聲線，用鬼五馬六的聲音唱著：「從此以後，無憂無求...」，所以若果你生得不夠「靚仔」，但聲音尚算不錯，長輩們大概會讚賞你「把聲好似張學友」，就好像范振堯一樣，遺憾他的聲音沒有一粒音長得像歌神一樣。 

四大天王一直雄霸廣東流行樂壇，直至那年，出現了陳奕迅和謝霆鋒。 





「見係你，我就講真話啦！我鐘意...謝霆鋒多d...」同樣用綿被蓋著頭的范振堯漲紅了臉，便把綿被掀開，深深吸一口氣。 

「鐘意謝霆鋒幾好啊！有咩值得講大話啊？」話筒傳來陳穎璇嬌滴的聲音。 

「無啊，通常d人都覺得鐘意陳奕迅就係鐘意佢有才華，鐘意謝霆鋒就只係貪佢有型，係膚淺囉...」 

「唔係阿！我覺得謝霆鋒都有才華啊！」 

「不過其實...我最鐘意都得鄭伊健...」 





「...」 

「陳穎璇！唔好Dead 晒先，鄭伊健係MK，但係鄭伊健浪漫喎！」 

「浪漫？點解先？其實我真係好少聽『伊麵』...」

「一個為你甘去蹈火海的人，問心！人一世、物一世都係想搵個咁既人o即！」 

「我都係鐘意謝霆鋒 - 非走不可！」 





「你個仆街仔！成四點幾仲係度煲電話粥！夜晚遲遲都唔訓，日頭又遲遲都唔願起身...」范振堯的背後傳來了范老爸的咆哮。 

陳穎璇匆匆掛了電話。 

「一個為你甘去蹈火海的人...」 

1999年，我們都沒有察覺到，在一切還未開始前，你經已是謝霆鋒，而我也經已是鄭伊健。