影月良憶(走甜): 我算什麼女人，算什麼女人

晨早流流比啲咁嘅嘢我嘆，果真感激。
就喺我欲哭無淚的時間裹面，巴士都已經到站。
一落車，嗰陣熱氣即刻起勢咁攻上嚟。
炎炎夏日，唔好講話行五分鐘，行十秒我都嫌多，何況後面嘅阿月手上嘅手機對我而言根本就係對多一秒都係煎熬。
終於翻到學校，我就好似隻脫離枷鎖嘅馬，衝上班房，然而行到走廊嘅時候。
迎面而上差ｄ就撞到阿雨，佢有少少驚訝咁望住我，然後嘴角揚起，好靦腆咁笑咗一下。
我都報以一個靦腆嘅笑容，然後離開咗，喺學校，我地只不過係「隔離班同學」嘅關係，在人前人後都唔應該有越界嘅接觸。
我走入班房，然而，班房裹面並無我心中期待見到嘅蕃薯蟲。
我望住蕃薯蟲既座位，心裹面空蕩蕩咁。
唔得！唔好再諗蕃薯蟲。




「小倩，我同你講呀！」阿怡走過嚟，同我講佢琴晚又同邊條邊條仔，講咗啲乜乜乜。
我扯起笑容，做出一副好有興緻既樣聽佢講野，但事實上我個心卻唔係喺佢度。
唔係唔想聽佢講嘢，只係，望佢嘅角度可以睇到蕃薯蟲個位，我根本就無法強制自己專心於佢既說話。
遲到既鐘聲響起，終於，蕃薯蟲翻黎啦。
一如既往既細眼睛，矮小既身材，扁塌塌既鼻。
無錯呀，佢就係我朝思暮想既蕃薯蟲。
好似一個大大既蕃薯，好似條蟲咁躝嚟躝去，唔知點解，我真係覺得好可愛。
蕃薯蟲望到我，又好似扮睇唔到咁。
不過算啦，佢翻左嚟就好。
「小倩，話說呢。」坐我背面嘅同學拍左一下我膊頭，我轉個頭同佢開始吹水。




同我同阿怡吹水一樣，同佢吹水嘅角度岩岩可以睇到蕃薯蟲個位。
蕃薯蟲同緊朗朗講野。
蕃薯蟲低著玩緊手機。
蕃薯蟲望住阿月傻笑。
蕃薯蟲躝係檯面訓教。
望望下咁，又到左放學翻屋企嘅時候。
同阿怡一齊行去搭地鐵既期間，我瞥到佢ｓｎａｐｃｈａｔ中嘅蕃薯蟲。
其實阿怡都算係一個幾多仔圍嘅女仔，但估唔到蕃薯蟲都同佢有聯絡。
呢點令我有啲驚訝之如，我對蕃薯蟲又多左分保留。
不過我諗諗下又釋懷左。




因為佢地兩個聯絡，其實唔關我事，就算管都唔輪到我管。
個心又有少少酸溜溜嘅感覺，但外表上我就笑得更開心。
「咦？原來你都有同蕃薯蟲聯絡架？」我笑住咁問阿怡。
張凱晴尷尬咁笑左一笑，揸住手機既手縮左一縮，呢種尷尬令我不自覺咁覺得佢地好似有啲嘢。
蕃薯蟲，你到底勾搭左幾多個女仔？
我係唔係只不過係其中一個？
張凱晴低下頭扮玩手機咁講：「無嘢呀，朋友嚟姐，好出奇咩。」
到底佢地係咪有嘢。
唔岩，我諗黎做咩姐。
係囉係囉，我諗黎做咩姐，蕃薯蟲又唔係我邊個。
就算真係又點，關我咩事姐，管都唔輪到我管。
我喺心中苦笑。