荒島日記（新手、後宮甜）（不定期更新）: 融入

「你地好！你地好！」
稀疏男不斷同周圍嘅人打招呼，好努力咁想融入我地嘅圈子。

獅子狗嘅打獵隊伍係接近天黑嘅時候就返咗嚟，今晚係飛機殘骸旁居住一晚，到處點著大大小小嘅火堆，對於稀疏男兩兄弟嚟講，真係好熱鬧。

「大家小心啲火，唔好造成山火，知唔知道？」
獅子狗講返清楚啲說話，不過臉上同身體嘅紅腫仍然未消退。

光頭佬端著食物左望右望，突然笑嘻嘻咁走到一邊，坐係個穿著白袍嘅女人身邊。
「你好啊～我叫健興～」



「你好。」
藍醫生冷淡地答佢。

依個光頭佬雖然傻傻地，但係睇靚女嘅眼光同正常人一樣，幾眼便睇完大花園裡面，唯獨這朵玫瑰係最美艷。

數日前食飯終於見到藍醫生口罩下嘅樣貌，真係美艷動人，令所有男性瞬間進入遐想狀態。

「我以前係同細佬係開魚蛋檔㗎～你以前係做咩㗎～」
光頭佬色瞇瞇咁望住藍醫生。



「我係醫生嚟。」
藍醫生依然用平淡嘅語氣回答。

「醫生～醫生好啊～我好鐘意醫生～」
光頭佬目光無離開過藍醫生。


「大陸仔，你睇咁啲咩啊？」
我擰轉頭，便見到雪兒此刻用鄙視嘅眼光望住我。



「無嘢，我觀察佢地兩兄弟姐。」
當然唔會同你講我睇咁藍醫生啦⋯


稀疏男也不甘示弱，坐係一眾女性中間，一眾女性望了佢一眼後，默默咁食自己手中嘅食物。

稀疏男用手梳一梳頭上剩餘嘅頭髮，好似小丸子裡面嘅花輪同學一樣。
「Hi～你地好，我叫謝發理。」

女性們再次望了佢一眼，然後繼續默默咁食手中嘅食物。

雖然佢地完全無理稀疏男，但稀疏男並無放棄，不斷咁嘗試製造話題。
「Hello，你幾好嗎？」
「嘩，靚女，你皮膚咁好嘅？」


「你用開乜嘢香水，咁香嘅？」
「你好似某個明星。」
「你鐘意邊個明星？我最鐘意林峰。」

「哎？你吃這麼久，是不是吃不完？」
其中一個女人望了稀疏男手中嘅食物一眼便問到。

終於有女性肯同稀疏男講嘢，哪怕係為咗佢手中嘅食物，稀疏男都感到好開心。

「哦～你想唔想食啊？你想就⋯⋯」
稀疏男未講完，個女人已經搶咗佢手中嘅食物，然後同同伴快速地分成幾份。

「謝謝。」
幾個女人一邊啜手指一邊答，稀疏男無奈咁望住佢地幾個。



稀疏男原本只係想分少少俾個女人，估唔到個女人二話不說就搶咗佢嘅食物，仲好快手咁分咗俾其他人食。

依兩隻發情嘅靈長類動物，希望唔會對依班女性做強迫嘅事啦。

「你是不是喜歡林峰？那你會不會唱他的歌？跳他的舞？」
其中一個女人問到，稀疏男見終於打開到話題。

於是稀疏男舉起手指公對住自己，好有自信咁講。
「其實我！一直以嚟嘅夢想！就係想做個大明星！」

稀疏男講完，便立即起身走到個女人面前勁歌熱舞。
「點樣擺甫士都有你嘅事～點解著黑絲都會變怪異～點樣講清楚⋯⋯」

全場人包括我在內，都呆咗咁望住稀疏男，因為稀疏男無論舞蹈定係唱功，都係十分特別的。



有幾個睇住稀疏男跳舞，無意中吞下啲骨頭而哽親。

「chok～chok～chok～」
稀疏男不斷扭動瘦弱嘅身體，配合上佢魔鬼一樣嘅步伐，令舞蹈變得很滑稽。

「唔知點解呢，我覺得佢有啲似唱《娃娃愛天下》個條友。」
四眼妹好細聲咁係我旁邊講。

「嘩⋯四眼妹⋯你幾時又走咗過嚟⋯」
四眼妹走路真係完全無聲，我同達叔經常俾佢嚇到。

「係你地太專心睇佢表演姐。」
四眼妹除低副眼鏡，用衣角抹一抹眼鏡上嘅塵埃。

稀疏男一直沈醉於自己嘅表演當中，雙眼一直咪埋嘅佢，根本無發現佢附近個班女一早起身離開。


「然後眾人被chok低～」

一分鐘後，佢睜開眼後先知周圍嘅人已經離開曬，只剩下佢一個，失望嘅佢，開始望向其他人群，尋找光頭佬嘅身影。

「健⋯」
稀疏男難受到說不出聲。

佢見到光頭佬健興，同白袍嘅女人交談得幾好，白袍嘅女人雖然無乜表情，但雙眼不時望向光頭佬，睇得出有專心聽光頭佬講嘢。

「有人話我有啲似金城武～哈哈～」
光頭佬仍然邊傻笑邊講。

藍醫生定定咁望住光頭佬數秒，然後講。
「係咩？但我覺得你似成奎安多啲 。」

「 成奎安～你鐘意成奎安？～」

藍醫生突然笑咗一下。
「算係掛，雖然佢個樣好似好惡，我覺得佢幾搞笑。」

藍醫生竟然識笑⋯雖然得個一瞬間嘅笑容，但我睇得出，藍醫生係發自內心咁笑⋯並唔係做作⋯

依個光頭佬⋯竟然將一個從來都無表情嘅人展現笑容⋯

我望向兩人不遠處嘅位置見到高佬佳同MK傑，兩人正以難以置信嘅表情望住藍醫生同光頭佬。

「咁我唔似金城武～我似成奎安～只要你鐘意～我就係成奎安～哈哈～」
光頭佬嘅笑容比剛才更瘋癲。

「送俾你啊～醫生～」
光頭佬唔知從邊到摘返嚟嘅野花。

藍醫生望了一眼野花，然後便收下。
「多謝你。」

藍醫生聞了一下野花，然後便將野花插在耳邊嘅髮鬢上，光頭佬開心到拍曬手。
「好靚啊～好靚啊～」

MK傑睇住此刻嘅光頭佬，真係恨不得衝上去打佢一鑊。



待續