荒島日記（新手、後宮甜）（不定期更新）: 機械

眾人見到儀器上火花四濺後便退後數步到門外，只剩低保護雪兒嘅我仍留係原地。


見到無再火花四濺，四眼妹先敢從門外走返入嚟。
「啱啱⋯發生乜嘢事⋯」

雪兒伸手去按開關，但儀器無再亮燈，無曬反應。
「壞⋯壞咗⋯」

眾人聽到消息後紛紛無辦法接受。


「唔係啊嘛！！！」


「唔得㗎⋯唔得㗎⋯我要返香港⋯」
達叔激動地跑返入嚟，再如一開始咁按曬所有儀器嘅開關，但儀器仍然沒有反應。

達叔不斷重複咁按儀器上嘅開關成分鐘，依然無反應後，然後便垂頭喪氣，坐係後面嘅座位上。

儀器嘅損壞令眾人感到難過。




我挨近到儀器開關到，聞到一股好輕微嘅燒焦味。
「睇嚟係電路板燒咗⋯」


「電子機械嘅嘢，咁係要搵博士幫手⋯如果博士係到嘅話⋯就好啦⋯」
坐在一旁垂頭喪氣嘅達叔講。

「博士？」
四眼妹疑惑咁望住我同達叔。




「達叔講嘅博士係廖正博，中六B班嘅理科超級天才，電子機械樣樣掂！所有壞咗嘅機械電器全部都會整得返。」
我在旁解釋到。

四眼妹聽到後感到失望。
「中六生⋯我仲以為真係大學教授嚟⋯」

達叔搖搖頭講。
「唔好睇小佢啊，之前我老竇架古董車，俾佢有次嚟我屋企時候無意中修理好，但我記得老竇講嘅，架古董車去咗好多車房都搞唔掂，就連原廠都話無辦法整返。」


「車點同飛機比⋯」
四眼妹唔信博士可以整返好啲儀器。



「話咗佢係超級天才，架古董車第一次見就已經識整，我相信飛機駕駛室嘅儀器肯定都難唔到佢！」
對於博士嘅能力，達叔係非常信任。


「佢依家應該係香港又唔知係到整咩。」
印象中記得博士係個種從朝整到晚嘅狂人，佢對電子機械嘅熱愛已經超乎常人。


以前係班房見親佢，佢都係攞住啲設計圖嚟睇，或者係攞住螺絲批整咁嘢。

傳聞仲話佢張床上面都係啲機械零件⋯


雪兒立即擰轉面同我講。
「唔係喎！我係郵輪上好似有見到佢！」




聽到雪兒咁講，我覺得奇怪。
「佢唔係從來唔參加群體活動嘅咩？佢份人咁獨來獨往，性格又奇怪，係得達叔先會同佢做到朋友。」


博士從來都唔會參加群體活動，無論係學校旅行還是同學聚會，定係陸運會，只要佢不敢興趣，佢就一定唔會參加。

同佢六年同班同學，我都只係見過佢去陸運會一次，個次出現係因為某個阿sir嘅風火輪壞咗，打電話叫佢過嚟修理。


達叔尷尬地用手R後腦勺。
「其實⋯我同佢都唔係好熟⋯個次佢嚟我屋企⋯係想佢幫我整吓我部電腦⋯原本佢唔肯嚟，之後我話屋企有好多壞咗嘅電器，佢先肯嚟我到⋯」




壞咗嘅電腦？我側面望去達叔，達叔立即尷尬咁笑。

唔洗諗，部電腦肯定係下載鹹片搞到中病毒壞咗，達叔唔敢攞出去俾人整，唯有拜託博士幫佢。


雪兒閉上雙眼，在記憶中努力尋找博士嘅身影，過咗半分鐘後便講。
「我記得啦，我個日係郵輪上嘅泳池見到佢，個時佢著住套工衣衝咗入嚟泳池到，即刻俾幾個職員攔住，聽講話博士佢想用泳池嚟測試佢手上嘅潛水機器人。」


四眼妹其中一個女伴講。
「新加坡今年搞世界潛水機器人大賽，我係郵輪上面有見過依個海報。」

達叔聽完個女仔所講後瞬間明白。
「哦！咁我好肯定係佢啦，畢業前個排，我見佢日日整咁舊嘢，話咩參加比賽。」




咁即係博士都有上到郵輪。

博士依種機械狂迷要係荒島生存，生存率接近零⋯


眾人此刻亦沈默不語，似乎係知道船難數月，仍然唔見博士身影，就已經確定博士凶多吉少。


「其實有無人覺得依到⋯異常地乾淨⋯」
我一講完，眾人便環顧四週，仔細咁睇駕駛室內每一處地方。

對比機艙嘅凌亂不堪，駕駛艙內似乎乾淨得有點離譜。


「睇嚟係一個有潔癖嘅靈體。」
蓬頭散髮嘅女仔好認真咁講。


「夠啦！！！」
眾人異口同聲對住蓬頭散髮嘅女仔。



待續