荒島日記（新手、後宮甜）（不定期更新）: 風波

高佬佳忍住疼痛，欲哭無淚咁望住肥豬劉，恨佢無令到我承認攞石頭掟佢，反而將佢爆咗出嚟。

獅子狗聽完後便走到我地面前，用傲視嘅目光望住我，令我緊張到吞下幾啖口水。
「王學東！係唔係你攞石頭掟傷佳仔嘅？」

其中幾個婦女睇到流曬口水。
「他真的好強壯啊⋯一個胳膊就相當於我兩條胳膊⋯不對，應該是三條胳膊⋯」

「好大隻⋯」



眾女眼定定咁望住獅子狗走上前嚟，望住佢虎背熊腰倒三角嘅身軀，塗滿全身嘅污泥都無法掩蓋佢發達嘅肌肉。

我企起身冷淡咁講。
「我無做過啵！」
（係我做㗎！吹啊？有本事就證明係我掟石頭啊！）

「真係無做過？」
獅子狗再問一次。

「東哥話無做過就無做過！獅子狗！高佬佳掟我地依單嘢又點計先？」


達叔無畏懼獅子狗，立刻企起身上前大聲問到。

肥豬劉亦走咗過嚟，佢扭動著雙臂，鬆動手臂上嘅筋骨。
「你地兩個咁無禮貌！施sir！唔洗俾面佢地，打柒佢地啦！我地三個上，大陸仔同佢一定打唔過我地嘅！係時候俾啲教訓佢地！」

達叔聽到肥豬劉嘅說話後，開始感到害怕，原本獅子狗一個就已經難對付，我地兩個打佢一個都未必打得贏，如果佢地三個一齊上，我地就一定輸硬⋯

望住獅子狗身上成寸厚嘅胸肌，粗壯有力嘅手臂，我同達叔嘅勝算係零⋯

達叔望一望我，等待咁我嘅決定，雖然佢嘅眼神中透露出一絲恐懼，但如果我決意要打，達叔都會肯同我一齊上，以前讀書個陣，我地係出面同人嘈，達叔都係永遠第一個害怕嘅人，但如果真係要打，佢都係義不容辭幫忙。



高佬佳見獅子狗幫佢出頭，便興奮到奔跑過嚟，頭殼頂嘅痛楚早已消失。
「施sir，打柒佢地啊！」

見到我地兩邊氣氛僵硬，圍觀嘅女仔議論紛紛，獅子狗仍然企係最前面，不過佢無怒視住我地，反而環顧四周圍觀嘅女，眾女見到獅子狗望咗佢地幾眼，緊張到震咗下。

高佬佳同肥豬劉一直等獅子狗開口，而獅子狗卻沈默咗成分鐘。

「對於阿佳對你地嘅所作所為，我代佢同你兩個道歉，對唔住。」
獅子狗講完，便掉轉頭離開。

我無聽錯啊嘛？獅子狗竟然道歉⋯

「吓⋯就咁完啦？」
高佬佳見獅子狗無動手打我一鑊而感到失望，獅子狗伸手拍一拍高佬佳同肥豬劉膊頭，示意一齊離開。



「施sir！真係唔洗驚佢地兩個喎！」
肥豬劉邊走邊講。

「施sir⋯施sir⋯」
高佬佳亦跟係獅子狗後面。

「以後大把機會。」
獅子狗冷冷地說一句，便繼續大步大步走返去原本捉蟹嘅位置。

高佬佳同肥豬劉失望地望住獅子狗嘅背影，報仇心切嘅佢地亦只能乖乖聽獅子狗嘅說話。

高佬佳怨恨咁擰轉頭望住我。
「今日放過你！下次唔會就咁算！」



我對住高佬佳挑釁嘅動作，然後再連續做幾個鬼臉，佢無辦法消依啖氣，俾我激到面紅耳赤。

肥豬劉見高佬佳俾我激到扎扎跳，於是走到佢身邊拉住佢。
「唔洗理佢啦，阿sir以後一定會幫我地出返啖氣嘅。」

「嚇死人⋯」
等到佢地離開後，達叔便雙腿一軟坐係泥地上，汗水開始不斷從額頭上湧出。

周圍圍觀嘅女人見佢三個一走後，亦都一一散去，繼續專心係附近挖泥蝦。

「東哥，真係奇怪，明明獅子狗一開始嘅眼神好似想殺咗我地，但過一陣後，竟然會同我地道歉認低威。」
達叔對於獅子狗嘅行為感到不解。

「你唔記得獅子狗佢最叻係咩？」



達叔挨近細聲問到。
「佢最叻係咩？」

我搭住達叔膊頭，然後望住周圍挖泥蝦嘅女仔。
「佢最叻係係其他人面前扮好人，如果啱啱無班女係附近，獅子狗佢地幾個可能已經郁手啦。」

達叔聽完我嘅說話後瞬間明白。
「係喎！以前係學校！佢都係所有人面前扮到好好先生咁，佢陰險奸詐嘅行為，只得我地足球隊會知⋯個時我仲同其他人講，其他人都唔信我講嘅嘢⋯」

「所以佢啱先係班女面前，唔郁手就係為咗建立好嘅形象。」

「我嘅女神嘉雯，竟然同啲咁虛偽嘅人一齊⋯我個心好痛啊⋯東哥⋯」
達叔扮哭臉咁攬住我，我用力推開佢。

「唉⋯基少陣啦⋯」


我尷尬咁望吓周圍，附近嘅女仔專注咁捕獵，所以無理會我同達叔嘅互動。

「話說，你同紫霜依家點啊？有無同佢咩咩過？」

達叔聽到我咁問後，一臉淫邪咁望住我。
「你估下～」



待續