荒島日記（新手、後宮甜）（不定期更新）: 相見

「哎！大陸仔係個到！」
肥豬劉伸手指向我地依邊，其他人便立刻望住我地。

嗌得咁大聲⋯好似驚我聽唔到佢嗌我咁⋯

「唔洗理佢地。」
說罷，獅子狗將泥漿塗滿全身，然後便跑向蟹群方向，蟹群見到猶如黑熊般嘅龐然大物衝咁過嚟，嚇到快速四散。

獅子狗一伸手，便輕而易舉地捉到兩隻大螃蟹，然後望都無望就向後拋去，噹聲響起，兩隻蟹好準確地投入鐵桶裡面。



高佬佳同肥豬劉立刻拍曬手，並且美言幾句。
「阿sir果然犀利！」

而我地依邊有幾個年紀稍微大啲嘅女人，見到獅子狗嘅捕獵技術後，已經發曬姣。
「哇～好厲害啊～」

達叔仲係到眼定定咁望住佢地幾個，我拍一拍達叔膊頭，示意唔洗再理會佢地，達叔再望多幾秒，然後便繼續埋頭苦幹地挖泥蝦。

「你地都快啲幫手捉。」
獅子狗擰轉頭對住高佬佳、肥豬劉同文健三人講，三人提著鐵桶，然後二話不說衝向蟹群，無幾耐，我便聽到文健嘅慘叫聲。


「啊！！！」

眾女抬頭望向慘叫咁嘅文健，然後搖曬頭咁繼續做嘢。
「佢果然係廢柴⋯」

「血⋯見血啊⋯我要返去搵醫生⋯」
文健驚恐咁握住右手嘅拇指，然後快速地離開泥地，跑返去營地嘅方向。

高佬佳同肥豬劉見到文健嘅情況後搖曬頭，而獅子狗沒有理會文健，繼續好專心咁捉蟹。



唔知過咗幾耐，突然我個後腦位置好似俾硬物打中，令我瞬間感到眩暈症狀，達叔見我停曬手並且有啲異樣後，即刻用雙手搖晃我身體。
「東哥？東哥？」

「我有啲頭暈⋯好似俾嘢打中個後腦⋯」

達叔起身想望下係啲咩打中我後腦，點知佢一起身，就有舊嘢飛快地打中佢塊面，衝擊力太大令到達叔失去平衡倒在泥地上，我走上前扶起達叔。

達叔用手抹走面上嘅爛泥。
「有人用泥彈打我地⋯」

我憤怒地望向泥彈飛過嚟嘅方向，係獅子狗佢地四個人，但佢地四個背對住我地，好似好努力咁捕捉螃蟹，完全唔知係邊個擲泥彈。

究竟係邊個咁仆街。

我觀察咗一陣，佢地四個依然無轉身，達叔休息咗一陣後便講。


「算啦東哥⋯依家獅子狗係到⋯我地兩個唔夠佢地玩㗎⋯」

「咁都無理由俾佢地恰㗎？」

附近有個同我地一齊挖蝦嘅女仔，小心翼翼並且不斷回頭望去，見四人仍然無擰轉頭，於是細細聲同我講。
「啱啱擲嘢打你地嘅，係阿佳⋯噓！唔好話係我講㗎⋯」

我望住高佬佳，雖然佢係到捉咁螃蟹，但卻在陰陰嘴笑，似乎係因為某啲事情令佢感到愉快。

睇嚟真係高佬佳～會用啲咁陰濕幼稚嘅玩法嘅確實係佢所作所為，既然佢咁鐘意玩咁鐘意扮嘢，我都要佢嘗試下俾人打頭嘅滋味。

我四周望一望，見到某樣嘢，我擰轉頭望住高佬佳背影，嘴角逐漸上揚⋯⋯





而營地個邊。



有一個人影靜雞雞咁走到營地個邊，佢係樹林邊觀察咗好耐，見營地完全無人行過經過，便快速地走到一個個山洞旁邊，伸個頭望向山洞裡面。

「唔係到～」
人影確認山洞裡面無其他人，立刻鬆了口氣，然後便小心翼翼咁走入山洞裡面，走到山洞裡嘅床褥邊，望住床上背對住佢訓教嘅人。

「喂，八婆。」
呼叫床褥上躺著嘅人。

「吓⋯邊⋯邊個⋯」
原本躺在床褥上迷迷糊糊嘅嘉雯，聽到背後有把聲音，嚇到震咗一下，然後快速攬住張被坐返起身。



俾某人嘅聲音嚇親嘅嘉雯，立刻擰轉頭望背後，原本驚恐嘅佢見到身後嘅人後，驚恐嘅表情瞬間轉變成疑惑，佢一邊梳返直啲頭髮一邊講。
「辣⋯辣椒妹？點解你會係到？」

企係佢背後嘅辣椒妹無奈地望住嘉雯。
「點解我唔可以係到？」

嘉雯繼續一邊梳頭髮一邊講。
「我以為你死咗。」

辣椒妹瞬間面紅耳赤，然後憤怒咁指住嘉雯講。
「哼！你死我都未死，死八婆！」

見到辣椒妹憤怒嘅樣，嘉雯完全無因此害怕，反而仲不屑咁望住辣椒妹。
「你嚟依到唔會係為咗同我嘈交嘛？」



辣椒妹聽到後便無講嘢，慢慢咁調節呼吸嚟平復心情，好讓自己冷靜返，嘉雯見辣椒妹如此舉動便橋住雙手等待辣椒妹。

過咗一陣，辣椒妹終於平聲平氣咁講。
「經歷今次船難嘅生死遭遇，以前我地係學校所有嘅恩恩怨怨就咁算數啦，今日我嚟依到，係有嘢想同你講。」

辣椒妹嘅說話令嘉雯感到奇怪，以前係學校嘅時候，雖然佢地兩個係同班同學，但因為發生過啲事而結怨結仇，所以大家從來都唔會理會對方，如果一搵對方，就一定係嘈交。
「你想同我講咩？」

辣椒妹回頭望一望背後，然後擰返轉頭好誠懇咁同嘉雯講。
「我想同你講⋯⋯」



待續