荒島日記（新手、後宮甜）（不定期更新）: 搬屋

「達叔！！！」

「我買啊！我買啊！」
達叔一邊嗌，一邊抽住兩個鐵桶，慢慢咁由遠處走過嚟。

四眼妹走到達叔旁邊，望一望桶裡面。
「原來你今朝搵我借兩個鐵桶，就係為咗捉蟹買紫霜啊？」

達叔尷尬咁對住四眼妹笑一笑，便繼續抽住兩個鐵桶過嚟，無幾耐走到我地依邊，我望一望桶裡面嘅情況，見到裝滿曬蟹同貝殼。



「嘩⋯好多蟹啊⋯」
營地眾女望住達叔兩個鐵桶，發出羨慕嘅聲音。

「如果有男仔咁樣對我⋯我一定嫁俾佢⋯」

「有點羨慕她⋯」

「阿達⋯你無事啊嘛⋯」
達叔其中一個女伴說到。



我地立刻望向達叔，先見到達叔除咗成身污糟之外，身體眾多地方紅腫一片，塊面更腫到成個豬頭般，手臂上亦有數條傷痕。

睇得出達叔係一邊忍住被蚊群咬，一邊忍住利鉗造成嘅疼痛去捕捉蟹。

「無事無事⋯一啲都唔痛⋯」
達叔把口就咁講，但佢女伴輕輕碰一碰佢身體，佢就已經痛到叫出聲。

達叔放低兩個鐵桶係後母美思面前，紫霜慢慢抬起頭，望住企係面前嘅達叔。

「嗱！你要嘅食物我已經捉夠，紫霜以後就跟我走！」


達叔上前去扶起紫霜。

後母美思即刻擋住達叔，然後雙眼不斷觀察達叔兩個鐵桶裡面嘅情況。
「咪住先！依到好似唔夠！最多都係得二十斤左右！」

「乜嘢唔夠啊？你今朝先話二十斤可以買紫霜返嚟。」

後母美思不屑咁望住我地幾個，然後冷笑一聲。
「呵！今朝講嘅價我覺得開低咗，所以依家係四十斤先可以買！」

「咩話？四十斤！你玩我啊！！！」
達叔憤怒咁望住後母美思，緊握暴露青筋嘅雙拳。

後母美思鄙視咁望達叔一眼，然後橋起雙手，好似高人一等嘅姿態對住我地講。
「乜嘢玩你啊？唔好咁大聲喝我！你唔夠食物！咪搵你兄弟借啲食物嚟囉！四十斤食物，對你地嚟講濕濕碎啦！」



「你⋯」
達叔想繼續講嘅時候，四眼妹拍一拍達叔嘅膊頭，表示等佢嚟講。

四眼妹托一托副眼鏡。
「你當初話二十斤就二十斤，做人要講誠信喎！」

後母美思望住四眼妹。
「依家係點啊？人多恰人少咁話？搞到我唔高興，依家要加到五十！無五十斤你唔洗旨意帶走佢！」

四眼妹冷笑幾聲。
「呵呵呵～你慢慢加啊！加到六十斤七十斤都無所謂！反正你點加落去，都唔會有人買得起！」

後母美思聽到便望一望周圍，除咗我地幾個外，其他圍觀嘅人都係營地嘅女仔，肥佬陳肥豬劉一早就離開返自己山洞或者捕獵。



深知其他人只係圍觀食花生，後母美思露出些少不安。

四眼妹見到後母美思不安嘅樣後，繼續乘勝追擊。
「你賣俾我地，起碼仲有二十斤食物，但如果唔賣，就一斤食物都無，你覺得以你嘅能力，仲可唔可以係依到生存落去？」

聽完四眼妹嘅說話，後母美思便仇視住佢，四眼妹令佢無曬面，佢好憤怒咁掃視我地，望到一旁焦慮嘅達叔，快速由怒顏轉變嘴角上揚。
「呵！唔洗講咁多啦！我寧願⋯⋯」

四眼妹立刻打斷佢講嘢。
「咁得啦，睇嚟你都無心做依筆交易！我地走！睇下佢可以忍到幾耐！」

四眼妹立刻托起一桶食物走，佢山洞同居嘅女伴亦托起另外個桶，後母美思驚訝咁望住佢地，望住佢地手中嘅兩桶食物，離佢愈嚟愈遠。

「得得得！我賣我賣！」
後母美思飛撲攬住鐵桶⋯



達叔伸手到紫霜面前，微笑咁對住佢。
「紫霜，我地返去啦。」

紫霜抬起頭望，原本雙眼空洞無神，突然變得明亮有神。

係依一刻，係紫霜眼中，達叔比天上嘅太陽更加耀眼，更加溫暖⋯⋯




「大陸仔！大陸仔！」
下晝嘅時候，辣椒妹突然急急忙忙咁跑入山洞。

「又乜嘢事啊？」



「營地⋯營地⋯出面⋯出面⋯」
辣椒妹指住山洞外。

「營地啲咩？」

辣椒妹捉住我隻手跑出山洞，見到唔少營地嘅女仔攞住一個個行李走到依邊嘅山洞，好似係選擇自己嘅新屋企。

佢地見到我地走出嚟後，立刻望實我地竊竊私語，留意住我嘅一舉一動。
「喂⋯佢地係到⋯」

「嗯⋯」
其他營地女仔點點頭，目光一直停留係我地身上。

辣椒妹疑惑咁望住不遠處嘅人群。
「佢地做乜會搬過嚟⋯」

「達叔囉⋯今日捉到咁多食物⋯佢地未嚟跟我地去捕獵，留係營地落去只會餓死，所以就嚟依到，睇吓可唔可以分一杯羹。」



待續